Jigarning yog'bosishidan qanday xalos bo'lish mumkin?
2026-02-24 09:55:00 / Yangiliklar
Xo'sh, bu qanday omillar bilan bog'liq?
Virusologiya ilmiy-tadqiqot instituti direktori, akademik Erkin Musaboev shu haqda ma'lumot berdi.
— Xastalik asosan nosog'lom turmush tarzi, ya'ni noto'g'ri ovqatlanish, kam harakatlik tufayli yuzaga keladi, — deydi olim. — Qolaversa, qandli diabet, gormonal almashinuv buzilishi va genetik xastaliklar ham ushbu muammoning omillaridan.
Bundan tashqari, spirtli ichimliklarni ko'p iste'mol qilish jigarga zarar etkazib, bu a'zo hujayralarida yog'lar to'planishiga sabab bo'ladi.
Xavotirli jihati, mazkur holat bora-bora jigar yallig'lanishi va disfunktsiyasiga olib kelishi ehtimoli yuqori. Jigar tsirrozi, jigar etishmovchiligi, jigar saratoni ham uning ta'sirida kelib chiqadi.
Dastlabki bosqichlarda jigar yog'li gepatozi sezilarli belgilarsiz kechadi. Ammo kasallik rivojlangani sari doimiy charchoq va holsizlik, qorin sohasida og'riq va noqulaylik, teri va ko'z oqining sarg'ayishi, nafas qisishi, sababsiz vazn ortishi yoki kamayishi kabi alomatlar kuzatilishi mumkin.
Shu bois xastalikni samarali davolash uchun, avvalo, bemor o'z turmush tarzini o'zgartirishi, ya'ni, yog'li, qovurilgan taomlardan voz kechib, mikronutrientlar va foydali moddalarga boy ozuqalar, meva-sabzavotlarni ko'proq iste'mol qilishi kerak.
Ayniqsa, antioksidantlarga boy noz-ne'matlar jigar faoliyatini qo'llab-quvvatlaydi. Shu bilan birga, jismoniy faollikni oshirish metabolizmni yaxshilash va jigar funktsiyasini tiklashga yordam beradi.
Zararli odatlarni tark etish, jumladan, spirtli ichimliklardan voz kechish va chekishni tashlash bu a'zo salomatligi uchun katta foyda keltiradi.
Yog'li gepatozni tashxislash va davolash uchun, albatta, shifokorga murojaat qilish kerak. Zarur hollarda, maxsus muolajalar belgilanishi mumkin. Davolanish mutaxassis nazorati ostida amalga oshirilishi talab etiladi.
Sog'liqni saqlash vazirligi
Matbuot xizmati.