Tadbir Sog'liqni saqlash vaziri Asilbek Xudayarovning ma'ruzasi bilan boshlandi. Vazir o'z chiqishida 2025 yilda sohada amalga oshirilgan ishlarni tanqidiy tahlil qilib, 2026 yildagi ustuvor vazifalar haqida to'xtaldi.

 — To'g'ri, qator yo'nalishlarda salmoqli natijalarga erishdik, sohada ijobiy o'zgarishlar bo'ldi, — dedi A.Xudayarov. — Lekin, bu ulkan maqsadlarimizning bir qismi, xolos. Islohotlarni izchil amalga oshirishda qat'iy tartib-intizom, sadoqat va mas'uliyat bo'lishi shart. Davlatimiz rahbari biz, soha mas'ullari oldiga katta vazifalarni qo'ygan. Bu yil islohotlarimiz samarasi, avvalo, quyi bo'g'inda, har bir mahallada sezilishi kerak. Rejalarimizni shunga ko'ra belgilab olishimiz, bunda har bir rahbarning vijdoni uyg'oq, shaxsiy mas'uliyati yuqori bo'lishi zarur. 

Ta'kidlanganidek, Prezidentimiz xalq salomatligini ta'minlash, tibbiyotni rivojlantirish uchun bu yil juda katta resurslarni yo'naltirmoqda. Masalan, birgina infarkt, insult, onkologik, nefrologik kabi yuqumli bo'lmagan kasalliklarni davolash, transplantasiya, vaktsinasiya, ona-bola salomatligini muhofaza qilish yo'nalishlariga o'tgan yillardagidan 1,5 barobar ko'p – 3,5 trln. so'm mablag'ajratilishi buning yaqqol tasdig'idir. 

Endi tizimdagi har bir mansabdor pastga tushib, quyi bo'g'indagi muassasalarda bo'lib, avvalo, hududlarning o'zida mavjud vaziyatni chuqur o'rganadi, aniqlangan kamchiliklarni joyida hal qilish choralarini ko'radi. 

Vazir ma'ruzada ijro intizomi, kasalliklar profilaktikasi, ularni erta aniqlash va davolash, sog'liqni saqlash tizimining yangi modelini samarali joriy etish, diagnostika va davolash jarayonlariga sun'iy intellekt hamda robot texnologiyalarini keng joriy etish, raqamlashtirish, kadrlar malakasini oshirish, sohadagi korrupsion holatlarning oldini olish, xorijiy investisiyalarni jalb qilish kabi qator masalalar tanqidiy tahlil qilindi.

Xususan, A. Xudayarov tizimda ijro intizomi haqida so'z yuritar ekan, o'tgan yili bir nechta topshiriqlar ijrosi ta'minlanmagani, Andijon, Jizzax, Qashqadaryo va Sirdaryo viloyatlari bo'yicha ijro hisobotlari tasdiqlanmagani jiddiy tanqid qildi. Shuningdek, bugungi kunda ixtisoslashtirilgan markazlar boqimanda kayfiyatda ekani va mavjud imkoniyatlardan samarasiz foydalanayotganini ta'kidlab, rahbarlar qat'iy ogohlantirildi.
Qolaversa, DMED tizimini keng joriy qilish, tez tibbiy yordam xizmatini yanada yaxshilash, tizimda komplaens-nazoratni yanada kuchaytirish yuzasidan aniq topshiriqlar berildi.

Vazir joriy yil Prezidentimiz korrupsiyaga qarshi kurashishda "favqulodda holat" e'lon qilganini ta'kidlab, tizimda byurokratiya, ta'magirlik va manfaatlar to'qnashuvi kabi korrupsion holatlarni bartaraf etish, bu borada rahbarlar shaxsiy namuna ko'rsatishi lozimligini qayd etdi. O'z navbatida, bu illatga qo'l urgan mas'ullar qat'iy jazolanishini aytib o'tdi.

Shundan so'ng kun tartibidagi navbatdagi masalalar yuzasidan vazirning birinchi o'rinbosari — A.Boboev, vazir o'rinbosarlari — E.Basitxanova, O.Omonov va F.Tashpulatov so'zga chiqdi.

Unda tibbiy yordamni tashkillashtirish, tibbiy sug'urta mexanizmlari, tibbiy standartlar, tibbiy ta'lim va innovasiyalarni joriy etish, onalik va bolalikni muhofaza qilish, investisiya hamda xaridlar, tizimni raqamlashtirish borasida o'tgan yil davomida bajarilgan ishlar, yo'l qo'yilgan xato va kamchiliklar, ularning echimlari hamda 2026 yildagi ustuvor vazifalar yuzasidan hisobotlar tinglandi.

Yig'ilish so'ngida mahallani rivojlantirish va jamiyatni yuksaltirish yilida pastga tushgan holda birlamchi bo'g'in muassasalari bilan integrasiyani mustahkamlash, malakali tibbiy xizmatni har bir xonadonga olib kirish, tibbiyotning yangi modelini belgilangan hududlarda samarali yo'lga qo'yish, tizimda raqamlashtirishni jadallashtirish, aholi orasida sog'lom turmush tarzini yo'lga qo'yish kabi masalalar yuzasidan aniq vazifalar yuklatildi.

Sog'liqni saqlash vazirligi 
Matbuot xizmati.