O‘zbеkistоn Rеspublikаsi Sоg‘liqni saqlash vаzirligi

Xo'sh, o'tgan davrda mazkur tizim qanday kutilgan natijalarni berdi?

Ushbu savolga tibbiyot va farmasevtika xodimlarining malakasini baholash markazi direktori Sanjar Sharipov batafsil javob berdi.

 — Yangi tizimga ko'ra, dastlab tibbiyot xodimlarining malaka toifasi berish bo'yicha yig'majild orqali hujjat topshirish amaliyoti bekor qilinib, elektron shaklga o'tildi, — deydi mutaxassis. — Hujjatlarning har bir bosqichda ko'rib chiqilishini to'g'ridan to'g'ri kuzatib borish tartibi joriy etildi.

Shuningdek:

 imtihon jarayonlarining onlayn translyasiyasi, audio va video kuzatuv nazorati ta'minlandi;

 "Tibbiy malaka axborot tizimi" (tibtoifa.ssv.uz) ishlab chiqildi; 

  nomenklaturadagi barcha mutaxassisliklar bo'yicha test va amaliy sinovlarga tegishli tabaqalashtirilgan savollar bazasi (o'zbek va rus tilida) yaratildi. Ular SSV hamda tibbiyot va farmasevtika xodimlarining malakasini baholash markazi rasmiy veb saytiga joylashtirildi;

imtihonlar onlayn shaklga o'tkazildi. 

Onlayn tartibdagi imtihon savollari "Random" dasturi orqali tanlanishi va natijalar o'sha zahoti e'lon qilinishi inson omili aralashuvini minimallashtirdi.

Malaka toifasi to'g'risidagi elektron sertifikatlar bazasi yaratildi. Boshqacha aytganda, malaka toifasi berilganini tasdiqlovchi qog'oz shaklidagi sertifikatlardan voz kechildi.

Natijada:

 malaka toifasini berish uchun talab etiladigan hujjatlar ro'yxati 14 tadan 11 taga qisqardi. Bunda qolgan hujjatlar idoralararo o'zaro axborot almashinuvi integrasiyasi natijasida avtomatik ravishda olinmoqda;

 tibbiyot xodimlarining hujjat topshirish va imtihondan o'tish uchun vaqt hamda mablag'sarflab poytaxtga kelishiga butunlay barham berildi.

Oylik maoshga ustama avtomatik qo'shiladi.

2025 yilda Prezidentning tegishli Farmon va qarorlariga asosan tajriba-sinov loyihasi doirasida 15 ta tuman (shahar)da malaka oshirish kursini tugatgan hamda belgilangan tartibda imtihondan o'tib, sertifikat olgan birlamchi tibbiy-sanitariya yordami muassasasi rahbari va tibbiyot brigadasi xodimlari uchun oylik maoshiga 100 foizgacha qo'shimcha ustama berish amaliyoti yo'lga qo'yildi.

Tajriba-sinov tariqasida joriy qilingan tuman (shahar)larning rahbar va tibbiyot brigadasi xodimlari uchun qo'shimcha ustama olish imkonini beruvchi hamda malaka toifasi berilganini tasdiqlovchi elektron sertifikatlar bazasi Iqtisodiyot va moliya vazirligining UzASBO-2 axborot tizimi bilan integrasiya qilindi.

Natijada tibbiyot xodimining oylik maoshiga ustama avtomatik tarzda qo'shiladigan bo'ldi. Bu esa tibbiyot xodimining kadrlar noziriga uchrab, ustama to'lash to'g'risida buyruq chiqarishini so'rash kabi inson omili aralashadigan holatlarning oldini olmoqda.

Shuningdek, klinik ordinatura (rezidentura) va internaturaga hujjat qabul qilish va imtihon topshirish ham to'liq raqamlashtirildi. Ya'ni bu jarayon medtoifa.ssv.uz axborot tizimi orqali FaceID tizimidan o'tgan holda tashkil etildi.

Statistikaga ko'ra, 2025 yilda 86 ta tuman (shaharda)gi 117 ming nafarga yaqin tibbiyot xodimi kompyuter savodxonligi va Dmeddan foydalanish bo'yicha o'qitilgan, imtihondan o'tkazilgan va sertifikat berilgan. 2026 yilda Sog'liqni saqlash vazirligi tomonidan qolgan tuman (shahar)lardagi tibbiyot xodimlarini ushbu yo'nalishlarda o'qitish, imtihondan o'tkazish va sertifikat berish rejalashtirilgan.

Sog'liqni saqlash vazirligi
Matbuot xizmati.