«Cho‘lni yashil makonga aylantiramiz!» – Viloyat hokimi Normat Tursunov misrlik investorlar bilan muhim loyihalarni muhokama qildi
2026-10-05 18:25:00 / Yangiliklar
Muzokaralar chog‘ida hududda qishloq xo‘jaligi va yerlarni o‘zlashtirish yo‘nalishida salmoqli investitsiya loyihalarini amalga oshirish masalalari keng muhokama qilindi.
Uchrashuvdan so‘ng delegatsiya vakillari Konimex tumanidagi Kengsoy hududiga borib, 3,6 ming gektar yaylov yer maydonlarini o‘zlashtirish va zamonaviy pivot usulida chorva ozuqasini yetishtirish loyihasining borishi bilan yaqindan tanishdilar. Bugungi kunda bu borada amaliy ishlar jadal boshlab yuborilgan bo‘lib, «Kengsoy» bosimli quvurini qurish va suv yig‘ish hovuzlarini barpo etish jarayoniga maxsus texnikalar hamda malakali ishchilar jalb etilgan.
Shuningdek, hamkorlik doirasida misrlik investorlarga Navoiy viloyatining sanoat zonalaridan maxsus joylar ajratib berish, ishlab chiqarish quvvatlarini yo‘lga qo‘yish va shu orqali yangi ish o‘rinlarini yaratib, mahalliy aholini band qilish imkoniyatlari taklif etildi.
Mazkur loyihalar ikki davlat o‘rtasidagi iqtisodiy aloqalarni mustahkamlash bilan birga, hududda suv tejovchi texnologiyalarni joriy etishda muhim qadam bo‘lib xizmat qilmoqda.