Navoiy viloyati hokimi Misr qishloq xo‘jaligi va melioratsiya vaziri bilan muzokaralar o‘tkazdi
2026-09-17 16:30:00 / Rahbarlar joriy faoliyati
Muloqot chog‘ida Navoiy viloyatining tabiiy-iqlim sharoiti, xususan 9 mln gektarga yaqin yaylov maydonlari mavjudligi va chorvachilikni rivojlantirish salohiyati qayd etildi. Shu bilan birga, suv tanqis hududlarda yem-xashak bazasini mustahkamlash, sho‘r va kam suvli yerlarda mos ozuqa ekinlarini yetishtirishda Misrning ilg‘or tajribalarini qo‘llash yuzasidan bir qator amaliy takliflar bildirildi.
Xususan, Misrning ilmiy muassasalaridan yaylovshunoslik, ozuqa ekinlari, tuproq va suv tahlili hamda chorvani oziqlantirish sohasidagi mutaxassislarni Navoiy viloyatiga (Konimex, Tomdi va Uchquduq tumanlariga) amaliy dala missiyasiga taklif etish, Navoiydan 8 nafar soha mutaxassisini (chorvador, agronom, veterinar va ozuqa mutaxassislarini) 14 kunga Misrga yuborib, cho‘l stansiyalarida suv tejamkor texnologiyalar va silos tayyorlash jarayonlari bilan tanishtirish, Misr kompaniyalari bilan birgalikda Navoiyda yuqori hosilli urug‘lik kartoshka yetishtirish va urug‘chilik bo‘yicha amaliy loyihalarni yo‘lga qo‘yish kabi takliflar muhokama etildi.
Uchrashuv so‘nggida janob Alaa Faruq Navoiy viloyatiga rasmiy tashrif buyurishga taklif etildi.