O‘zbekiston Respublikasi Iqtisodiyot va moliya vazirligi

Farmonga ko‘ra:

respublikadagi mavjud 8 milliondan ortiq turar va noturar joylar, 7 millionga yaqin yer uchastkalarining iqtisodiy aktiv sifatidagi qiymati aniqlanadi;

ko‘chmas mulk obyektining oldi-sotdi qilish, garovga qo‘yish, jamoat ehtiyojlari uchun olib qo‘yish, soliq solish, va boshqa holatlar uchun aniqlanadigan qiymati o‘zaro mutanosib bo‘lishi ta’minlanadi;

ko‘chmas mulk bozoriga oid ishonchli, to‘liq va davriy ravishda yangilanib boradigan axborot bazasi yaratiladi;

soliq solishda adolatlilik tamoyili yanada keng joriy etiladi.

Hujjatga ko‘ra, 2025-yildan boshlab bosqichma-bosqich barcha ko‘chmas mulk obyektlari ularning bozor narxiga yaqin bo‘lgan qiymatini aniqlash maqsadida davriy ravishda ommaviy baholashdan o‘tkaziladi.

Iqtisodiyot va moliya vazirligi – ko‘chmas mulkni ommaviy baholash sohasida yagona davlat siyosatini amalga oshiruvchi organ etib belgilandi. Ko‘chmas mulkni ommaviy baholash sohasida ijro etuvchi organ sifatida Kadastr agentligi huzurida Ko‘chmas mulkni ommaviy baholash milliy markazi tashkil etiladi.

Ommaviy baholash ishlari quyidagi bosqichlarda amalga oshiriladi:

2025–2026-yillarda – eksperiment tariqasida Toshkent shahrida;

2026–2027-yillarda – Nukus shahri va viloyatlar markazlarida;

2027-yil va undan keyingi yillarda – qolgan hududlarda.

2025-yil 1-dekabrga qadar Toshkent shahridagi eksperimentning dastlabki natijalaridan kelib chiqib, ommaviy baholashdan o‘tkazilgan mol-mulklar va yer uchastkalari uchun mol-mulk solig‘i va yer solig‘i bo‘yicha soliq solinadigan bazani qaytadan belgilash va soliq stavkalarini pasaytirish bo‘yicha Vazirlar Mahkamasiga takliflar kiritiladi.

Bozor narxiga asoslangan ko‘chmas mulk qiymatining joriy etilishi ko‘chmas mulkka solinadigan soliq stavkalarini pasaytirish hamda soliq solishda adolatlilik tamoyillarini ta’minlashga asoslangan ko‘chmas mulkni soliqqa tortish tizimini yaratish imkonini beradi.

Iqtisodiyot va moliya vazirligi

Axborot xizmati