2024-yilda iqtisodiyotning turli sohalarida mahalliy va xorijiy investorlarlar bilan 8,9 mlrd AQSh dollarlik 129 ta davlat-xususiy sheriklik loyihalari bitimlari imzolandi.

1. 2030-yilgacha davlat-xususiy sheriklik tamoyillari asosida amalga oshiriladigan yirik infratuzilma loyihalari roʻyxati shakllantirilib, tasdiqlandi. Bugungi kunda mazkur 63 ta loyihaning 39 tasi bo‘yicha ishlar boshlab yuborildi.

Jumladan:

– Fargʻona viloyatida DXSh asosida koʻp tarmoqli shifoxona qurish va xususiy boshqaruvga berish loyihasi boʻyicha xalqaro tender bosqichi eʻlon qilindi;

– Samarqand viloyatida elektr tarmoqlarini modernizatsiya qilish va xususiy sektor boshqaruviga berish loyihasi boʻyicha xalqaro tender eʻlon qilindi;

– Osiyo taraqqiyot banki ko‘magida Toshkent shahri va Toshkent viloyatida DXSh asosida maktablar tashkil etish loyihasi yuzasidan xalqaro tender ochildi, birinchi bosqichi yakunlandi hamda yakuniy bosqichi e’lon qilindi;

– Urganch xalqaro aeroportini DXSh asosida modernizatsiya qilish va xususiy boshqaruvga berish loyihasi boʻyicha xalqaro tender e’lon qilindi va birinchi bosqichi yakunlanib, yakuniy bosqichi ochildi.

– Quvvati 41.6 MWt (Megavatt) boʻlgan kichik va oʻrta gidroenergetika loyihasi yuzasidan tenderning yakuniy bosqichiga oʻtildi.

2. 2024-yilda imzolangan jami davlat-xususiy sheriklik loyihalarida hududlardagi kichik loyihalar umumiy qiymati 33 mln AQSh dollarni tashkil etdi.

3. Sohani institutsional rivojlantirish yo‘nalishida ham sezilarli o‘zgarishlar amalga oshirildi. Xususan, 2030-yilgacha 30 mlrd dollarlik DXSh loyihalarini amalga oshirishga koʻmaklashuvchi “Davlat-xususiy sheriklik loyihalari markazi” loyiha ofisi tashkil etildi. DXSH yoʻnalishida mutaxassislarni qayta tayyorlash va malakasini oshirish bo‘yicha chora-tadbirlar ishlab chiqildi.

Yirik namunaviy (Flagship) loyihalarni amalga oshirish uchun loyiha ekspertlari, loyiha menejerlari biriktirildi, loyihalarni rivojlantirishda yondashuv o‘zgardi.

4. Yil davomida Janubiy Koreya, Turkiya va Fors ko‘rfazi davlatlarida o‘tkazilgan taqdimotlar (road show) doirasida salohiyatli xorijiy investorlarni istiqbolli DXSh loyihalari bilan tanishtirildi.

Shu bilan birga, Jahon banki guruhi va Xalqaro valyuta jamg‘armasining (XVJ) yillik uchrashuvlari doirasida Jahon banki vakillari bilan davlat-xususiy sheriklik dasturlari asosida amalga oshirilayotgan loyihalar yuzasidan fikr almashildi.

 “Oʻzbekiston–2030” strategiyasida Davlat-xususiy sheriklikni rivojlantirish maqsadlariga mutanosib va tizimli ravishda erishish maqsadida Davra suhbati oʻtkazildi, mazkur tadbirda 200 dan ortiq davlat organlari vakillari, mahalliy va xalqaro moliya institutlari ekspertlari hamda investorlar jamlagan holda DXSh tizimini takomillashtirish bo‘yicha amaliy taklif va muhokamalar olib borildi.

2025-yilda DXSh sohasida oldinga yanada yuqori maqsadlar belgilangan.

1.   Xususan, ta’lim sohasida - OTB ko‘magida Samarqand viloyatida 100 ta maktabgacha taʼlim muassasasini qurish, rekonstruksiya qilish va jihozlash, OTB ko‘magida Toshkent shahri va Toshkent viloyatida jami 14 ming oʻrinli 13 ta umumtaʼlim maktabini qurish va jihozlash, sog‘liqni saqlash sohasida – Xalqaro moliya korporatsiyasi koʻmagida Fargʻona viloyatida 800 oʻrinli koʻp tarmoqli shifoxona tashkil etish, transport sohasida – Namangan, Buxoro, yangi Toshkent xalqaro aeroportlarni xususiy boshqaruvga berish, energetika sohasida – Samarqand, Jizzax va Sirdaryo viloyatlari elektr energiyasi tarmoqlari boshqaruviga xususiy sektor jalb qilish va boshqa yo’nalishlarda umumiy qiymati 6,5 mlrd AQSH dollari miqdoridagi Davlat-xususiy sheriklik tamoyillari asosida loyihalar boʻyicha bitimlar imzolanadi.

2.Kichik loyihalar ko‘lamini kengaytirish maqsadida loyihani amalga oshirishning yangi soddalashtirilgan mexanizmi ishlab chiqiladi.

3. Qiymati 1 mln dollardan ortiq bo‘lgan loyihalarni amalga oshirish tartibi yuzasidan qo‘llanma (Handbook) ishlab chiqilib, amaliyotga joriy etiladi.

3. DXSh loyihalari amalga oshirilishining barcha bosqichlarini hamda loyihalar reyestrini yuritish va monitoringi olib borilishini yanada takomillashtirish maqsadida DXSH loyihalarining elektron platformasi ishga tushiriladi.

4. 2025-yilda Davlat-xususiy sheriklikni yanada rivojlantirish maqsadida III Davlat-xususiy sheriklik Forumi tashkil etish rejalashtirilgan. Forum oʻz navbatida Oʻzbekiston hukumati, xalqaro moliya va kredit tashkilotlari vakillari hamda xususiy investorlar muloqot maydoni sifatida xizmat qiladi.

Iqtisodiyot va moliya vazirligi

Axborot xizmati