Ta’limni moliyalaştirişda yangi yondaşuvlar: Özbekiston delegatsiyasi London tajribasini örgandi
2026-11-17 16:50:00 / Vazirlik yangiliklari

Taşrifdan közlangan asosiy maqsad ta’limni moliyalaştiriş tizimini takomillaştiriş, ta’lim kreditlarini ajratiş va qaytarişning zamonaviy mexanizmlarini örganiş, şuningdek, Buyuk Britaniyaning ilğor tajribasini Özbekiston şaroitiga moslaştiriş imkoniyatlarini muhokama qilişdan iborat böldi.
Muloqotlar davomida ta’limni moliyalaştirişning zamonaviy modellari, ta’lim kreditlari bozorini rivojlantiriş, oliy ta’lim muassasalarining moliyaviy barqarorligini ta’minlaş hamda aholining turli qatlamlari uçun ta’lim oliş imkoniyatlarini kengaytiriş masalalari körib çiqildi.
Xususan, Buyuk Britaniyada qöllanilayotgan daromadga boğliq ta’lim kreditlari (Income-Contingent Loans) mexanizmiga alohida e’tibor qaratildi. Mazkur tizimda kreditlarni qaytariş bitiruvçilarning mehnat faoliyati va daromad darajasiga boğliq holda amalga oşiriladi.
Uşbu yondaşuv kredit tölovlarini bitiruvçilarning moliyaviy imkoniyatlariga moslaştiriş, ta’lim oliş imkoniyatlarini kengaytiriş hamda ta’lim kreditlari tizimining uzoq muddatli moliyaviy barqarorligini ta’minlaş nuqtayi nazaridan muhokama qilindi.
Şuningdek, soliq organlari, iş beruvçilar, ta’lim muassasalari va moliyaviy taşkilotlar örtasida axborot almaşinuvini yölga qöyiş, kreditlar qaytarilişini samarali boşqariş hamda moliyaviy tavakkalçiliklarni kamaytiriş böyiça amaldagi mexanizmlar örganildi.
Uçraşuvlarda ta’lim kreditlari va davlat grantlari örtasidagi mutanosiblikni ta’minlaş, davlat budjetiga tuşadigan moliyaviy yuklamani maqbullaştiriş, şuningdek, xotin-qizlar, kam ta’minlangan oilalar farzandlari va ijtimoiy himoyaga muhtoj aholi qatlamlarining ta’lim oliş imkoniyatlarini kengaytiriş masalalariga ham e’tibor qaratildi.
Bundan taşqari, mehnat bozori talablaridan kelib çiqqan holda kadrlar tayyorlaşni moliyaviy rağbatlantiriş, oliy va professional ta’lim muassasalarining moliyaviy mustaqilligini oşiriş, şuningdek, ta’lim oluvçilarning bandligi, daromadlari va kredit majburiyatlariga oid ma’lumotlar bazalarini integratsiya qiliş yuzasidan tajriba almaşildi.
Mazkur xizmat safari Jahon banki bilan hamkorlikda Özbekistonda amalga oşirilayotgan “EduImkon” dasturi doirasidagi islohotlar bilan bevosita boğliq.
Dastur ta’lim kreditlari tizimini takomillaştiriş, aholining ta’lim oliş imkoniyatlarini kengaytiriş, kreditlarni ajratiş va qaytariş jarayonlari samaradorligini oşiriş hamda Ta’lim kreditlari jamğarmasining uzoq muddatli moliyaviy barqarorligini mustahkamlaşga qaratilgan.
Taşrif davomida örganilgan xalqaro tajriba va ekspertlar tomonidan bildirilgan tavsiyalar Özbekistonda ta’limni moliyalaştirişning amaldagi mexanizmlarini takomillaştiriş, xalqaro tajribaga asoslangan yangi yondaşuvlarni milliy amaliyotga moslaştiriş hamda “EduImkon” dasturi doirasidagi islohotlarni izçil davom ettirişda inobatga olinadi.
Iqtisodiyot va moliya vazirligi
Axborot xizmati va kommunikatsiyalar boşqarmasi




