Xalqaro valyuta jamg‘armasi vakillari bilan hamkorlik masalalari muhokama qilindi
2026-10-16 19:20:00 / Vazirlik yangiliklari
Uchrashuvda XVJning Yaqin Sharq va Markaziy Osiyo bo‘yicha departametni direktori o‘rinbosari Tanos Arvanitis, O‘zbekiston Respublikasi Markaziy banki raisi o‘rinbosari Nodirbek Ochilov, Iqtisodiyot va moliya vaziri maslahatchisi Jasur Karshibayev hamda boshqa mas’ul vakillar ishtirok etdi.
Uchrashuvda tomonlar O‘zbekistondagi iqtisodiy-moliyaviy jarayonlar, o‘rta muddatli iqtisodiy istiqbollar hamda XVJ bilan o‘zaro manfaatli hamkorlikni yanada kengaytirish masalalarini muhokama qildi.
Xususan, mamlakatimizda amalga oshirilayotgan iqtisodiy islohotlarni qo‘llab-quvvatlash, davlat moliyasini boshqarish tizimini takomillashtirish va fiskal siyosat samaradorligini oshirishga qaratilgan chora-tadbirlar yuzasidan fikr almashildi.
Muloqot davomida XVJning texnik ko‘magi asosida davlat xarajatlarini tahlil qilish, budjetni rejalashtirish va prognozlash, shuningdek, fiskal siyosatning iqtisodiy va ijtimoiy ta’sirini baholash mexanizmlarini rivojlantirish masalalariga e’tibor qaratildi.
Shuningdek, davlat korxonalarini xususiylashtirish va transformatsiya qilish, pensiya tizimini isloh etish, soliq va bojxona ma’murchiligini takomillashtirish hamda pul-kredit siyosati samaradorligini oshirish kabi ustuvor yo‘nalishlarga ham to‘xtalib o‘tildi.
Muzokaralar yakunida tomonlar o‘zaro manfaatli hamkorlik aloqalarini yanada rivojlantirish hamda yuqoridagi masalalar yuzasidan fikrlar almashinuvi jarayonlarini kengaytirishga kelishib oldi.
Iqtisodiyot va moliya vazirligi
Axborot xizmati va kommunikatsiyalar boshqarmasi