Yarimo‘tkazgichlar sanoati uchun kadrlar va texnologiyalar bo‘yicha Malayziya bilan hamkorlik mustahkamlanmoqda
2026-10-16 16:15:00 / Vazirlik yangiliklari
Tashrifning birinchi bosqichi Kuala-Lumpur shahrida bo‘lib o‘tdi. Delegatsiya Malayziyaning IC Design Park majmuasi hamda ushbu yo‘nalishdagi asosiy hamkorlardan biri — MIMOS Berhad tashkiloti faoliyati bilan tanishdi.
Tashrif doirasida MIMOS Berhad laboratoriyalari, yarimo‘tkazgich plastinalari (wafers)ni ishlab chiqarish, mikroelektron qurilmalar prototiplarini yaratish, integral mikrosxemalarni sinovdan o‘tkazish va ularning ishonchliligini baholashga mo‘ljallangan texnologik infratuzilma o‘rganildi.
Shuningdek, delegatsiya Selangor AI & Semiconductor Summit 2026 xalqaro sammitida ishtirok etdi. Tadbir doirasida yarimo‘tkazgichlar va sun’iy intellekt yo‘nalishlarida faoliyat yurituvchi tashkilotlar bilan uchrashuvlar o‘tkazilib, istiqbolli hamkorlik yo‘nalishlari muhokama qilindi.
Tashrifning muhim natijalaridan biri O‘zbekiston va Malayziya tashkilotlari hamda oliy ta’lim muassasalari o‘rtasida hamkorlik memorandumlarining imzolanishi bo‘ldi.
Jumladan, O‘zbekistonning ToshTech texnika universiteti va Malayziyaning ASEM Academy hamda Great ASIC kompaniyasi, shuningdek, O‘zbekistonning Cyber University oliy ta’lim muassasasi bilan Malayziyaning Asia e University (AeU), Asia Pacific University of Technology & Innovation (APU) oliy ta’lim muassasalari va AlphaSwift kompaniyasi o‘rtasida hamkorlik memorandumlari imzolandi.
Mazkur kelishuvlar yarimo‘tkazgichlar sanoati uchun malakali mutaxassislar tayyorlash, ilmiy-tadqiqot va amaliy loyihalarni rivojlantirish, ilg‘or texnologiyalar bo‘yicha tajriba almashish hamda ta’lim va sanoat o‘rtasidagi aloqalarni mustahkamlashga xizmat qiladi.
Ayni paytda O‘zbekiston delegatsiyasining Malayziyaga amaliy tashrifi ikkinchi bosqichda Penang shahrida davom etmoqda.
Iqtisodiyot va moliya vazirligi
Axborot xizmati va kommunikatsiyalar boshqarmasi