Özbekiston Respublikasi Iqtisodiyot va moliya vazirligi

Tadbir vazirlik tizimi xodimlarining kasbiy bilim va ko‘nikmalarini oshirish, budjet qonunchiligiga rioya etilishini ta’minlash, moliyaviy nazorat samaradorligini kuchaytirish hamda korrupsiyaviy xavflarning oldini olish maqsadida tasdiqlangan reja-jadval va o‘quv dasturi asosida o‘tkazildi.

Seminarda hududiy iqtisodiyot va moliya organlari hamda Pensiya jamg‘armasi tizimidan 6 ta guruhga ajratilgan jami 117 nafar xodim ishtirok etdi.

Xususan, o‘quv-seminarda quyidagi yo‘nalishlarda faoliyat yurituvchi rahbar va mutaxassislar qatnashdi:

· Hududiy iqtisodiyot va moliya bosh boshqarmalarining hudud iqtisodiy o‘sishini tahlil qilish va prognozlash, drayver sohalar asosida maqsadli dasturlarni ishlab chiqish va monitoring qilish sho‘balari boshliqlari;

· Ijtimoiy soha muassasalarini moliyaviy ta’minlash, Ijtimoiy sug‘urta jamg‘armasi mablag‘larini boshqarish hamda ijtimoiy sug‘urta nafaqalari to‘lovlarini monitoring qilish bo‘limlari (sho‘balari) yetakchi mutaxassislari;

· Tuman (shahar) iqtisodiyot va moliya bo‘limlarining sanoatni rivojlantirish bo‘yicha bosh mutaxassislari;

· Budjet daromadlarini prognozlashtirish va tahlil qilish bo‘yicha bosh mutaxassislar;

· Mahallalarning moliyaviy ta’minotini tashkil etish va fuqarolar tashabbusli budjeti jarayonlarini muvofiqlashtirish bo‘yicha bosh mutaxassislar;

· Tuman (shahar) bo‘limlarining fuqarolarga xizmat ko‘rsatish sho‘balari bosh mutaxassislari.

O‘quv dasturiga muvofiq, Iqtisodiyot va moliya vazirligining Ichki audit departamenti hamda Komplayens xizmati boshqarmasi mas’ul xodimlari tomonidan budjet intizomi, moliyaviy nazorat, korrupsiyaga qarshi kurashish va manfaatlar to‘qnashuvining oldini olishga oid dolzarb masalalar yuzasidan taqdimotlar o‘tkazildi.

Jumladan, 2025-yilda Davlat budjeti, shu jumladan mahalliy budjetlar daromadlari prognozlari va xarajatlarining amaldagi ijrosi, shuningdek, 2025–2026-yillarda o‘tkazilgan audit va nazorat tadbirlari natijasida Qoraqalpog‘iston Respublikasi, viloyatlar hamda Toshkent shahri mahalliy budjetlarida, G‘aznachilik xizmati va Pensiya jamg‘armasi tizimida aniqlangan xato va kamchiliklar atroflicha tahlil qilindi.

Shuningdek, vazirlik tizimida 2025–2026-yillarda korrupsiyaga qarshi kurashish, manfaatlar to‘qnashuvining oldini olish va yuzaga kelgan holatlarni bartaraf etish borasida amalga oshirilgan chora-tadbirlar hamda tashkil etilgan profilaktik tadbirlar yuzasidan batafsil ma’lumot berildi.

Tadbir yakunida ishtirokchilar bilan ochiq muloqot tashkil etilib, budjet intizomini yanada mustahkamlash, moliyaviy qonunbuzarliklarning oldini olish, korrupsiyaviy xavflarni kamaytirish hamda manfaatlar to‘qnashuviga yo‘l qo‘ymaslik bo‘yicha fikr va takliflar muhokama qilindi.

Mazkur yo‘nalishdagi o‘quv-seminarlar va davra suhbatlari tasdiqlangan reja-jadval asosida vazirlik tizimining boshqa tarkibiy tuzilmalari xodimlari ishtirokida ham davom ettiriladi.

Iqtisodiyot va moliya vazirligi
Axborot xizmati va kommunikatsiyalar boshqarmasi