O‘zbekiston Respublikasi Iqtisodiyot va moliya vazirligi

Tadbirning asosiy maqsadi O‘zbekiston va Rossiyada tashabbusli budjetlashtirishni rivojlantirish bo‘yicha shakllangan amaliy tajribani o‘rganish, fuqarolarning budjet jarayonlaridagi ishtirokini kengaytirish mexanizmlarini muhokama qilish hamda sohada qo‘llanilayotgan zamonaviy yondashuvlar yuzasidan fikr almashishdan iborat bo‘ldi.
 

Tadbirda O‘zbekistonda tashabbusli budjetlashtirish tajribasining ta’lim sohasiga tatbiq etilishi misolida “Mening maktabim” loyihasiga ham alohida e’tibor qaratildi. Mazkur loyiha orqali tashabbusli budjetlashtirish amaliyoti maktab darajasiga olib chiqilib, 5–11-sinf o‘quvchilariga o‘z maktablari uchun loyihalar taklif etish va ular bo‘yicha ovoz berish imkoniyati yaratildi. 2025/2026-o‘quv yilidan boshlab loyiha barcha maktablarni qamrab oldi.
 

“Mening maktabim” loyihasida ham ochiqlik, raqamlashtirish va bevosita ishtirok tamoyillariga ustuvor ahamiyat berilgan. Jarayon “Ochiq budjet” portali orqali amalga oshiriladi, har bir maktab uchun alohida maqsadli jamg‘arma shakllantiriladi hamda o‘quvchilar o‘z maktabining rivoji uchun zarur bo‘lgan yo‘nalishlarni tanlash jarayonida bevosita ishtirok etadi. Bu yondashuv yosh avlodda jamoaviy mas’uliyat, tashabbuskorlik va budjet mablag‘laridan oqilona foydalanish ko‘nikmalarini shakllantirishga xizmat qilmoqda.
 

Davra suhbatida Rossiya tomonining tashabbusli budjetlashtirish yo‘nalishidagi tajribasi va amaliy yondashuvlari yuzasidan ham fikr almashildi. Xususan, fuqarolar ishtirokini kengaytirish, tashabbuslarni qo‘llab-quvvatlash va ularni amalga oshirish samaradorligini oshirishga qaratilgan yondashuvlar muhokama qilindi. Shu bilan birga, turli mamlakatlarda shakllangan amaliyotlarni o‘rganish va ularni milliy sharoitdan kelib chiqib qo‘llash masalalarining dolzarbligi qayd etildi.
 

Shuningdek, tadbir doirasida videokonferensiya aloqa orqali Rossiya Federatsiyasining Udmurt Respublikasi, Krasnoyarsk o‘lkasi va Sankt-Peterburg shahri, shuningdek, Qirg‘iziston Respublikasi hamda O‘zbekiston Respublikasidagi maktab o‘quvchilari ishtirok etdi.
 

Muloqotda o‘quvchilar tashabbusli budjetlashtirish bo‘yicha o‘z maktablarida shakllangan amaliyot va tajribalar bilan o‘rtoqlashib, amalga oshirilayotgan tashabbuslar hamda o‘quvchilarning jarayondagi ishtiroki yuzasidan fikr almashdilar. Mazkur muloqot turli mamlakat va hududlardagi yoshlar o‘rtasida o‘zaro tajriba almashish va tashabbusli budjetlashtirish bo‘yicha ilg‘or yondashuvlarni o‘rganish uchun samarali imkoniyat yaratdi.
 

Davra suhbatining ikkinchi qismida ishtirokchilar Mirobod tumanidagi 83- va 56-maktablarga tashrif buyurib, ta’lim muassasalarida tashabbusli budjetlashtirish mexanizmlarining amaliy qo‘llanilishi bilan yaqindan tanishdilar. Tashrif davomida maktablarda amalga oshirilgan tashabbuslar, yaratilgan sharoitlar hamda o‘quvchilarning budjet jarayonlaridagi ishtiroki yuzasidan fikr almashildi.

Iqtisodiyot va moliya vazirligi

Axborot xizmati va kommunikatsiyalar boshqarmasi