Pensiya islohoti masalalari bo‘yicha xalqaro ekspertlar bilan uchrashuv bo‘lib o‘tdi
2026-09-29 21:10:00 / Vazirlik yangiliklari
Uchrashuvda Xalqaro mehnat tashkiloti Ijtimoiy himoya departamenti Aktuar xizmatlar bo‘limi rahbari Andre Pikard, Xalqaro valyuta jamg‘armasi Fiskal masalalar departamenti katta iqtisodchisi Chaba Feher hamda Jahon bankining ijtimoiy himoya masalalari bo‘yicha katta mutaxassisi Himanshi Jeyn qatnashdi.
Uchrashuv davomida xalqaro tajriba hamda mamlakatning ijtimoiy-iqtisodiy xususiyatlarini hisobga olgan holda pensiya tizimini yanada takomillashtirishning asosiy yo‘nalishlari ko‘rib chiqildi.
Pensiya tizimining uzoq muddatli barqarorligini ta’minlash, pensiya huquqlarini shakllantirish mexanizmlarini takomillashtirish, aholining pensiya tizimi bilan qamrovini kengaytirish, jamg‘arib boriladigan tarkibiy qismni rivojlantirish hamda tizimni demografik o‘zgarishlarga moslashtirish masalalariga alohida e’tibor qaratildi.
Shuningdek, ishtirokchilar pensiya tizimi arxitekturasini yanada takomillashtirishga oid mumkin bo‘lgan yondashuvlarni, jumladan, turli pensiya komponentlarini uyg‘unlashtirish masalalarini muhokama qildilar.
Uchrashuv doirasida pensiya jamg‘armalarini boshqarish, individual pensiya hisobvaraqlarini rivojlantirish, investitsiya mexanizmlari hamda pensiya aktivlarini boshqarishning institutsional yondashuvlari yuzasidan fikr almashildi.
Uchrashuv yakunida tomonlar pensiya islohotining kelgusidagi yo‘nalishlari yuzasidan fikr almashib, aktuar, moliyaviy va ijtimoiy jihatlarni hisobga olgan holda ekspertlar o‘rtasidagi hamkorlikni davom ettirish muhimligini qayd etdilar.
Iqtisodiyot va moliya vazirligi
Axborot xizmati va kommunikatsiyalar boshqarmasi