Oʻzbekistonda qishloq xoʻjaligi faoliyati hisobiga oid yangi milliy standart tasdiqlandi
2026-09-29 16:50:00 / Vazirlik yangiliklari
Mazkur standart Oʻzbekiston Respublikasi Prezidentining 2025-yil 15-sentabrdagi PQ–282-son qarori bilan belgilangan vazifalar doirasida amalga oshirilayotgan islohotlarning navbatdagi amaliy natijasidir.
Qishloq xoʻjaligi mamlakat iqtisodiyotining muhim tarmoqlaridan biri boʻlib, undagi biologik jarayonlar, mavsumiylik va tabiiy-iqlim sharoitlari buxgalteriya hisobini yuritishda oʻziga xos yondashuvlarni talab etadi.
Shu nuqtayi nazardan, yangi standart biologik aktivlar, qishloq xoʻjaligi mahsulotlari va biologik aktivlarga taalluqli davlat yordamini hisobga olishning yagona qoidalarini belgilaydi. Bunda xalqaro standartlar tamoyillari Oʻzbekiston qishloq xoʻjaligining tarmoq xususiyatlariga moslashtirilgan.
Standartning muhim amaliy jihatlaridan biri – fermer xoʻjaliklari uchun soddalashtirilgan hisob yuritish tartibining nazarda tutilganidir. Bu hisob yuritish jarayonlarini yengillashtirishga, moliyaviy hisobotning ishonchliligi va taqqoslanuvchanligini taʼminlashga xizmat qiladi.
70-son MHMSning qabul qilinishi qishloq xoʻjaligi subyektlarining moliyaviy holati va faoliyat natijalari toʻgʻrisidagi axborot sifatini oshirish, investorlar va kreditorlar uchun ishonchli axborot muhitini shakllantirish hamda sohada moliyaviy boshqaruvni takomillashtirishga koʻmaklashadi.
Shu maʼnoda, mazkur standart yangi avlod MHMSlar tizimini shakllantirishga qaratilgan oʻzaro bogʻliq islohotlarning tarkibiy qismi sifatida ahamiyatlidir. Uning joriy etilishi milliy moliyaviy hisobot tizimini xalqaro amaliyotga yaqinlashtirish, iqtisodiyotning real sektorida moliyaviy shaffoflikni oshirish va investitsiya muhitini yaxshilashga xizmat qiladi.
Mazkur standart 2027-yil 1-yanvardan kuchga kiradi.
Iqtisodiyot va moliya vazirligi tomonidan milliy moliyaviy hisobot standartlarini ishlab chiqish va joriy etish ishlari izchil davom ettirilmoqda.
Maʼlumot uchun: 70-son MHMSga qadar quyidagi yangi avlod standartlari davlat roʻyxatidan oʻtkazilgan:
1. “Moliyaviy hisobotni tuzish va taqdim etishning Konseptual asoslari” (roʻyxat raqami: 3854, 2026-yil 10-iyun);
2. 2-son MHMS “Moliyaviy hisobotlarni tayyorlash asoslari: hisob siyosati va hisob baholari” (roʻyxat raqami: 3810, 2026-yil 11-aprel);
3. 77-son MHMS “Nodavlat notijorat tashkilotlari uchun soddalashtirilgan buxgalteriya hisobi va moliyaviy hisobot” (roʻyxat raqami: 3917, 2026-yil 4-avgust);
4. 1-son MHMS “Moliyaviy hisobotlarda axborotlarni taqdim etish va yoritib berish” (roʻyxat raqami: 3923, 2026-yil 13-avgust).
Iqtisodiyot va moliya vazirligi
Axborot xizmati va kommunikatsiyalar boshqarmasi