O‘zbekiston Respublikasi Iqtisodiyot va moliya vazirligi

 28-sentabrdan 1-oktabrgacha davom etadigan tadbir yarimo‘tkazgichlar fizikasi, mikroelektronika, zamonaviy texnologiyalar va ushbu yo‘nalishlarda xalqaro hamkorlikni rivojlantirish masalalarini muhokama qilish uchun muhim ilmiy maydon sifatida xizmat qiladi.
 

Konferensiya O‘zbekiston Respublikasi Iqtisodiyot va moliya vazirligi, “O‘zeltexsanoat” uyushmasi, O‘zbekiston Respublikasi Fanlar akademiyasi, Oliy ta’lim, fan va innovatsiyalar vazirligi, Raqamli texnologiyalar vazirligi, O‘zbekiston fiziklar kengashi, Osiyo taraqqiyot banki hamda boshqa xalqaro hamkorlar ko‘magida tashkil etilmoqda.
 

Tadbirda 55 nafar xorijiy olim va mutaxassis hamda O‘zbekistonning qariyb 100 nafar olimi ishtirok etmoqda. Xalqaro va mahalliy ilmiy hamjamiyat vakillarining bir maydonda jamlanishi zamonaviy yarimo‘tkazgich texnologiyalari bo‘yicha tajriba almashish, ilmiy aloqalarni kengaytirish va kelgusidagi hamkorlik yo‘nalishlarini muhokama qilish imkonini bermoqda.
 

Mikroelektronika va yarimo‘tkazgichlar sanoatini rivojlantirish istiqbollari
 

Konferensiyaning birinchi kunida xalqaro ekspertlar ishtirokida zamonaviy mikroelektronika va yarimo‘tkazgichlar sanoatini rivojlantirishning dolzarb masalalari muhokama qilindi.
 

Xususan, Siemens EDA (Germaniya), GreatAsic Technology (Malayziya), Osiyo taraqqiyot banki hamda National Yang Ming Chiao Tung University (Tayvan) vakillari ishtirokida mikroelektronika sanoatini rivojlantirish bo‘yicha xalqaro tajriba va ilg‘or amaliyotlar, yarimo‘tkazgichlar sohasining global qiymat zanjiridagi o‘rni va mavjud imkoniyatlar, shuningdek, integral mikrosxemalarni loyihalash va ilg‘or texnologik yechimlarni joriy etish masalalari atroflicha ko‘rib chiqildi.
 

Shuningdek, sun’iy intellekt texnologiyalaridan yarimo‘tkazgichlar va mikroelektronika sohasida foydalanish, zamonaviy chiplarni loyihalash jarayonlarini takomillashtirish, ilmiy-tadqiqot va muhandislik salohiyatini rivojlantirish bo‘yicha xalqaro tajriba yuzasidan fikr almashildi.
 

Muhokamalar davomida turli mamlakatlarning yarimo‘tkazgichlar sanoatini rivojlantirish bo‘yicha tajribasi, global texnologik tendensiyalar hamda ushbu yo‘nalishda xalqaro ilmiy va texnologik hamkorlikni kengaytirish imkoniyatlariga alohida e’tibor qaratildi.
 

Mazkur muloqotlar O‘zbekistonda yarimo‘tkazgichlar fizikasi, mikroelektronika, chip dizayni, ilmiy-tadqiqot faoliyati va yuqori texnologiyali kadrlar tayyorlash yo‘nalishlarini rivojlantirish istiqbollarini xalqaro tajriba asosida muhokama qilish uchun muhim imkoniyat yaratdi.
 

Fan, texnologiya va sanoat o‘rtasidagi hamkorlik
 

Konferensiyaning asosiy jihatlaridan biri — fundamental ilmiy tadqiqotlar bilan amaliy texnologik rivojlanish o‘rtasidagi aloqalarni mustahkamlashga qaratilganidir.
 

Yarimo‘tkazgichlar fizikasi va mikroelektronika yo‘nalishidagi taraqqiyot zamonaviy sanoatning ko‘plab tarmoqlari, jumladan, raqamli texnologiyalar, telekommunikatsiya, avtomobilsozlik, energetika va boshqa yuqori texnologiyali yo‘nalishlar bilan bevosita bog‘liq.
 

Shu sababli mazkur konferensiya doirasidagi xalqaro tajriba almashinuvi ilmiy tadqiqotlarni rivojlantirish, zamonaviy texnologiyalarni o‘rganish, malakali mutaxassislar tayyorlash hamda ilm-fan va sanoat o‘rtasidagi hamkorlikni kengaytirish uchun muhim platforma bo‘lib xizmat qiladi.
 

O‘zbekiston uchun esa ushbu yo‘nalishdagi xalqaro tajribani o‘rganish yarimo‘tkazgichlar, mikroelektronika, integral mikrosxemalarni loyihalash, ilmiy-tadqiqot ishlari va yuqori texnologiyali ishlab chiqarish bo‘yicha rivojlanish istiqbollarini chuqurroq muhokama qilish imkonini beradi.
 

Xalqaro konferensiya 1-oktabrga qadar davom etadi. Tadbirning keyingi kunlarida ham yarimo‘tkazgichlar fizikasi, mikroelektronika, ilmiy hamkorlik, texnologik rivojlanish va sanoat uchun yangi imkoniyatlarga oid masalalar yuzasidan fikr va tajriba almashinuvi davom ettiriladi.

Iqtisodiyot va moliya vazirligi

Axborot xizmati va kommunikatsiyalar boshqarmasi