Jahon banki vakillari bilan yangi iqtisodiy o‘sish yo‘nalishlari muhokama qilindi
2026-09-25 21:40:00 / Vazirlik yangiliklari
Uchrashuvda Jahon bankining Markaziy Osiyo bo‘yicha mintaqaviy direktori Naji Benhassin, Yevropa va Markaziy Osiyo bo‘yicha mintaqaviy amaliyot direktori Abebe Adugna, Xalqaro moliya korporatsiyasining O‘zbekiston va Turkmanistondagi mintaqaviy rahbari Nil Makkeyn hamda boshqa mas’ullar ishtirok etdi.
Muloqot davomida tomonlar O‘zbekiston iqtisodiyotini yangi bosqichga olib chiqish istiqbollari, yuqori iqtisodiy o‘sishning davomiyligini ta’minlash, shuningdek, yangi o‘sish manbalarini shakllantirish masalalari yuzasidan muhokamalar olib bordi.
Uchrashuvda mamlakatda amalga oshirilayotgan iqtisodiy islohotlarni qo‘llab-quvvatlash, xususiy sektorning faolligini oshirish, investitsiyalarni rag‘batlantirish hamda yangi va sifatli ish o‘rinlarini yaratish uchun qulay shart-sharoitlarni yanada rivojlantirish masalalariga alohida e’tibor qaratildi.
Bundan tashqari, muzokaralarda tomonlar iqtisodiyot tarmoqlari salohiyatini oshirish, tadbirkorlik muhitini yanada yaxshilash, iqtisodiyotning raqobatbardoshligini oshirish hamda global qiymat zanjirlaridagi ishtirokni kengaytirish kabi yo‘nalishlar yuzasidan fikr almashdi.
Uchrashuv yakunida tomonlar konstruktiv muloqotni izchil davom ettirish, iqtisodiy islohotlarni keng qo‘llab-quvvatlash hamda mamlakatning uzoq muddatli, barqaror va inklyuziv iqtisodiy o‘sishi uchun yangi imkoniyatlarni birgalikda o‘rganishda hamkorlikni kengaytirishga kelishib oldi.
Iqtisodiyot va moliya vazirligi
Axborot xizmati va kommunikatsiyalar boshqarmasi