“Yashil” iqtisodiyot loyihalarini baholash tartibi boʻyicha seminar oʻtkazildi
2026-08-25 17:50:00 / Vazirlik yangiliklari
Ushbu tadbir BMT Taraqqiyot dasturi, Yevropa Ittifoqi va Fransiya taraqqiyot agentligi (FTA) ko‘magida Oʻzbekistonda “Yashil rivojlanishni moliyalashtirishni qoʻllab-quvvatlash” loyihasini amalga oshirish doirasida mamlakatning “yashil” iqtisodiyotga oʻtish va barqaror moliyalashtirish tizimini rivojlantirishga qaratilgan amaliy qadam sifatida Yashil iqtisodiyot loyihalari markazi va Markaziy bank hamkorligida tashkil etildi. Seminarda 16 ta tijorat bankidan 40 nafardan ziyod mutaxassis va ekspertlar ishtirok etdi.
Tadbirda “Yashil” iqtisodiyot loyihalarini baholash tartibining asosiy talablari va uni banklarning kreditlash jarayonlariga integratsiya qilish masalalari muhokama qilindi. Milliy “yashil” iqtisodiyot taksonomiyasiga muvofiq, “yashil” loyihalar qayta tiklanuvchi energetika, toza transport, energiya samaradorligi, suv va resurslardan samarali foydalanish, dekarbonizatsiya va ekotizimlarni muhofaza qilish kabi 5 ta asosiy yoʻnalishni qamrab oladi.
Amaliy mashgʻulotlar davomida ishtirokchilar Milliy “yashil” iqtisodiyot taksonomiyasi mezonlari asosida loyihalarni baholash, texnik koʻrikdan oʻtkazish, issiqxona gazlari emissiyasi qisqartmalarini hisoblash, mavjud kredit portfelidagi “yashil” loyihalarni aniqlash boʻyicha amaliy koʻnikmalarni mustahkamladilar. Shuningdek, quyosh fotoelektr stansiyasini barpo etish va “yashil” transport misolida loyihani baholash jarayoni bosqichma-bosqich koʻrib chiqildi.
Seminarning keyingi muhim bosqichi sifatida ikki oylik texnik pilot loyihani amalga oshirish rejalashtirilgan. Pilot doirasida “yashil” loyihalarni baholash mezonlarining amaliy samaradorligi sinovdan oʻtkazilib, ularni banklarning kreditlash va monitoring jarayonlariga integratsiya qilish imkoniyatlari baholanadi.
Mazkur tashabbus tijorat banklarida “yashil” loyihalarni mustaqil baholash salohiyatini oshirish, “yashil” kredit portfelini shakllantirish hamda xalqaro iqlim moliyasi, shu jumladan, CIF doirasida jalb qilinadigan imtiyozli moliyaviy resurslardan samarali foydalanish uchun zarur shart-sharoitlarni yaratishga xizmat qiladi.
Iqtisodiyot va moliya vazirligi
Axborot xizmati va kommunikatsiyalar boshqarmasi