“Axborot texnologiyalari markazi” DUKda sun’iy intellekt vositalaridan foydalanish bo‘yicha yoshlar o‘rtasida amaliy master-klass o‘tkazildi
2026-08-13 19:30:00 / Vazirlik yangiliklari
Tadbir davomida ishtirokchilarga “ChatGPT”, “Gemini” kabi zamonaviy sun’iy intellekt platformalaridan kundalik ish faoliyatida samarali foydalanish bo‘yicha amaliy tavsiyalar berildi.
Amaliy master-klass davomida ishtirokchilarga sun’iy intellekt platformalarining imkoniyatlari, afzalliklari va amaliy qo‘llanilishi haqida batafsil ma’lumotlar taqdim etildi. Master-klass xodimlarning raqamli kompetensiyalarini oshirish, shuningdek, zamonaviy vositalardan samarali foydalanish ko‘nikmalarini shakllantirish maqsadida tashkil etildi.
Tadbir davomida ishtirokchilarga sun’iy intellekt vositalari yordamida tahliliy hisobotlar va taqdimotlar tayyorlash bo‘yicha amaliy ko‘rsatmalar berildi. Xususan, ma’lumotlarni tizimlashtirish, tahlil qilish hamda natijalarni vizual va tushunarli shaklda taqdim etishning zamonaviy usullari o‘rgatildi. Shuningdek, sun’iy intellekt vositalaridan foydalanishda ma’lumotlar xavfsizligi va maxfiyligini ta’minlash masalalariga alohida e’tibor qaratildi.
Amaliy mashg‘ulot yakunida ishtirokchilar o‘zlarini qiziqtirgan savollar yuzasidan mutaxassislardan batafsil javoblar oldilar. Tadbir so‘ngida yoshlar yetakchilari va davlat tashkilotlari xodimlarining raqamli ko‘nikmalarini muntazam ravishda takomillashtirib borish, shuningdek, zamonaviy sun’iy intellekt texnologiyalaridan samarali foydalanish madaniyatini shakllantirish zarurligi alohida ta’kidlandi.
Iqtisodiyot va moliya vazirligi
Axborot xizmati va kommunikatsiyalar boshqarmasi