Oʻzbekistonda energetika sohasida davlat tariflarini tartibga solishning yangi tizimi joriy etildi
2026-08-07 17:50:00 / Vazirlik yangiliklari
Energetika sohasida davlat tariflarini tartibga solishning yangi tizimi joriy etilishi Hukumat tomonidan avval eʼlon qilingan energetika sohasini isloh qilish dasturining hamda Regulatory Asset Base (RAB) metodologiyasi asosida tarif shakllantirish tizimiga bosqichma-bosqich oʻtishning navbatdagi bosqichi hisoblanadi (https://gov.uz/en/imv/news/view/159309).
Mazkur bosqich doirasida Oʻzbekiston Respublikasi Vazirlar Mahkamasi huzuridagi Idoralararo tarif komissiyasi tomonidan elektr energiyasini ishlab chiqarish, uzatish, taqsimlash va taʼminot, shuningdek tabiiy gazni transportirovka qilish hamda gaz taʼminoti xizmatlari boʻyicha tartibga solinadigan tariflar tasdiqlandi.
Muhim. Idoralararo tarif komissiyasi tomonidan tasdiqlangan mazkur tariflar faqat energetika sohasidagi tartibga solinadigan tashkilotlar oʻrtasidagi hisob-kitoblarda qoʻllaniladi. Ushbu qaror aholi, tadbirkorlik subyektlari hamda boshqa yakuniy isteʼmolchilar uchun amaldagi elektr energiyasi va tabiiy gaz tariflarini oʻzgartirmaydi.
Avval eʼlon qilingan va tasdiqlangan tartibga solinadigan tariflarning taqqoslanishi
|
Segment |
2026-yil 1-avgustdan amalda qoʻllaniladigan tariflar |
Avval eʼlon qilingan tariflar (2026-yil sentyabridan kechiktirmay) |
|---|---|---|
|
Elektr energiyasini ishlab chiqarish |
8 % |
9 % |
|
Elektr energiyasini uzatish |
18 % |
30 % |
|
Elektr energiyasini taqsimlash |
4 % |
10 % |
|
Tabiiy gazni taqsimlash |
28 % |
23 % |
Ayrim tasdiqlangan tariflar avval eʼlon qilingan parametrlardan farq qiladi. Bu davlat tariflarini tartibga solishning yangi tizimiga bosqichma-bosqich oʻtish hamda keyingi oʻzgarishlarni davlat byudjeti sikli bilan muvofiqlashtirish bilan bogʻliq. Tariflar 2027-yilning birinchi yarim yilligida qayta koʻrib chiqilishi rejalashtirilgan.
RAB metodologiyasi tartibga solinadigan tariflarni tartibga solinadigan aktivlar qiymati, iqtisodiy jihatdan asoslangan operatsion xarajatlar hamda investitsiyalar asosida shakllantirishni nazarda tutadi.
Bunda yangi metodologiyaning qoʻllanilishi tartibga solinadigan tashkilotlar tomonidan taqdim etilgan barcha xarajatlar va investitsiyalarning tariflarga avtomatik ravishda kiritilishini anglatmaydi. Tartibga solinadigan tariflarni tasdiqlash toʻgʻrisidagi qarorlar Oʻzbekiston Respublikasi qonunchiligida belgilangan tartibda Idoralararo tarif komissiyasi tomonidan qabul qilinadi.
Yangi tizim energetika korxonalarining moliyaviy barqarorligini taʼminlash, energetika infratuzilmasini modernizatsiya qilish, energiya taʼminoti ishonchliligi va koʻrsatilayotgan xizmatlar sifatini oshirishga xizmat qiladi. Shu bilan birga, davlat tariflarni tartibga solish va tabiiy monopoliya subyektlari faoliyatini tartibga solish boʻyicha oʻz vakolatlarini amaldagi qonunchilikka muvofiq saqlab qoladi.
Metodologiya ishlab chiqilishida xalqaro ilgʻor tajriba, xalqaro moliya institutlarining tavsiyalari hamda Oʻzbekiston energetika sohasining oʻziga xos xususiyatlari inobatga olindi.
Energetika sohasida davlat tariflarini tartibga solishning yangi tizimini joriy etish energetika tarmogʻini isloh qilishning muhim bosqichi hisoblanadi hamda tarif shakllantirish jarayonining shaffofligini oshirish, uzoq muddatli investitsiyalarni jalb qilish, energetika infratuzilmasini modernizatsiya qilish va tabiiy monopoliya sohalarida davlat tomonidan tartibga solish saqlangan holda energiya taʼminoti ishonchliligini yanada oshirish uchun zarur shart-sharoitlarni yaratadi.
Idoralararo tarif komissiyasining qarori bilan ushbu havola orqali tanishish mumkin.
Iqtisodiyot va moliya vazirligi
Axborot xizmati va kommunikatsiyalar boshqarmasi