Namangan viloyatida kelajakka hozirlik, yangi iqtisodiyot va sun’iy intellekt masalalari muhokama qilindi
2026-07-29 19:30:00 / Vazirlik yangiliklari
Joriy yilning 28–29-iyul kunlari Iqtisodiyot va moliya vazirligi hamda Birlashgan Millatlar Tashkilotining Aholishunoslik jamg‘armasi (UNFPA) hamkorligida Namangan viloyatida “Kelajakka tayyor iqtisodiyot sari: yangi imkoniyatlar va strategik yondashuvlar” mavzusida ikki kunlik tadbirlar o‘tkazildi. Unda mahalliy hokimyat organlari, oliy ta’lim muassasalari, IT park rezidentlari, tadbirkorlar va startapchilar ishtirok etdi.
Tashrif doirasida Namangan viloyati hokimi Shavkat Shokirdjanovich bilan uchrashilib, hudud iqtisodiyotini sun’iy intellekt, innovatsiyalar va zamonaviy texnologiyalar asosida rivojlantirish masalalari muhokama qilindi.
Shuningdek, 15 nafarga yaqin hokim maslahatchisi va startapchi tomonidan 35 dan ortiq sun’iy intellekt loyihasi taqdim etildi. Xalqaro ekspert Samer Chidiak ularning biznes modeli, amaliy qiymati va rivojlanish imkoniyatlarini baholab, mualliflarga aniq tavsiyalar berdi.
Tashrif davomida Namangan viloyat hokimligining Vaziyatlarni boshqarish markazi, “Megaton” korxonasi, IT Park Namangan viloyati filiali va Namangan davlat texnika universitetidagi innovatsion ishlanmalar bilan tanishildi.
Tadbirning ikkinchi kunida 100 nafardan ortiq olim, tadbirkor va startapchi ishtirokida global texnologik o‘zgarishlar, yangi biznes modellari hamda ilm-fan va sanoat hamkorligiga bag‘ishlangan seminar o‘tkazildi.
O‘tkazilgan uchrashuvlar va muhokamalar Namanganda ilm-fan, biznes va davlat o‘rtasida yangi muloqot maydonini shakllantirdi. Bu esa mavjud g‘oyalarni puxta tayyorlangan, iqtisodiy jihatdan asoslangan va investitsiya jalb qilishga tayyor loyihalarga aylantirish uchun muhim zamin yaratadi.
Iqtisodiyot va moliya vazirligi
Axborot xizmati va kommunikatsiyalar boshqarmasi