Demografik o‘zgarishlardan iqtisodiy imkoniyat sari: O‘zbekistonning ish o‘rinlari va inson kapitali kelajagi muhokama qilindi
2026-07-24 20:45:00 / Vazirlik yangiliklari
Seminarda Iqtisodiyot va moliya vazirligi, UNFPA, xalqaro institutlar hamda respublikaning 40 dan ortiq vazirlik va idoralaridan 80 nafarga yaqin mas’ul ishtirok etdi.
Seminar davomida Oʻzbekistonda demografik rivojlanishning bugungi holati va 2050-yilgacha boʻlgan istiqbollari muhokama qilindi. Xususan, demografik oʻzgarishlar sharoitida iqtisodiyot va mehnat bozori, inson kapitali hamda ijtimoiy sohada yuzaga kelishi mumkin boʻlgan bosimlar tahlil qilinib, ularni samarali boshqarish va salbiy taʼsirini kamaytirishga qaratilgan taklif hamda tavsiyalar bildirildi.
Xalqaro ekspert Samer Chidiac fasilitatorligida ishtirokchilar O‘zbekistonning kelajakdagi rivojlanishiga doir to‘rtta ehtimoliy ssenariyni tahlil qildi. Bunda ssenariylar aniq prognoz sifatida emas, balki istiqboldagi imkoniyat va xatarlarni baholash hamda samarali yechimlarni ishlab chiqish vositasi sifatida qo‘llanildi.
Muhokamalar beshta ustuvor yo‘nalish — ayollarning iqtisodiy imkoniyatlarini kengaytirish, yoshlar va kelajak iste’dodlarini rivojlantirish, faol keksayish, o‘zgarib borayotgan mehnat modellari hamda kelajak ko‘nikmalari va umrbod ta’lim bo‘yicha ishchi guruhlarda olib borildi. Unda sun’iy intellekt va avtomatlashtirishning mehnat bozoriga ta’siri, yoshlarni istiqbolli kasblarga tayyorlash, ayollarning iqtisodiy faolligini oshirish, norasmiy bandlikni qisqartirish, aholi keksayishiga tayyorgarlik ko‘rish hamda zamonaviy qayta tayyorlash va malaka oshirish tizimlarini rivojlantirish masalalari muhokama qilindi.
Seminar yakunlari bo‘yicha “Ish o‘rinlari va inson kapitali kelajagi” tashabbuslar portfeli shakllantirilib, unda kelajakdagi imkoniyat va muammolarga javob beruvchi amaliy siyosatlar, loyihalar hamda strategik tashabbuslar jamlandi.
Iqtisodiyot va moliya vazirligi
Axborot xizmati va kommunikatsiyalar boshqarmasi