Samarqand shahrida fazoviy-hududiy rejalashtirish boʻyicha seminar tashkil etildi
2026-07-15 18:35:00 / Vazirlik yangiliklari
Ushbu seminar Iqtisodiyot va moliya vazirligi, Samarqand viloyati hokimligi tomonidan BMT Taraqqiyot dasturi va Yevropa Ittifoqi bilan hamkorlikda tashkil etildi.
Seminarning asosiy maqsadi mahalliy hokimlik va hududiy tashkilotlar tegishli mutaxassislarining ilgʻor xorijiy tajriba va yangicha loyihalash tamoyillarini fazoviy-hududiy strategiya va rejalar, jumladan master rejalarni ishlab chiqish va amaliyotga joriy etishda qoʻllash boʻyicha koʻnikmalarini oshirishdan iborat.
Seminarda Fransiyaning “Groupe Huit” va Buyuk Britaniyaning “Buro Happold” kompaniyalari tomonidan ishlab chiqilgan Qamashi tumanida yangicha loyihalash yondashuvi asosida 105 gektar maydonda aralash funksiyali (mixed use) turar joy kompleksini (Yangi Oʻzbekiston massivi) barpo qilish master rejasi taqdimot qilindi.
Taqdimot davomida loyiha “ijtimoiylashuv”, 15 daqiqalik shahar (mahalla) tamoyillari, energiya samarador material va texnologiyalarlarni qoʻllash, “odam masshtabi”dagi aralash funksiyali (mixed use) binolar, aholi piyoda xavsiz xarakatlanadigan alleya va yoʻlaklar, park va yashil hududlarni oʻz ichiga olganligi yuqori baholandi.
Shuningdek, loyihalash va qurilishda energiya samaradorlikni oshirish, rejalashtirishda sunʼiy intellekt va transport modellashtirishning oʻrni, Samarqand, Buxoro, Navoiy, Jizzax va Sirdaryo viloyatlari boʻyicha fazoviy-hududiy strategiya va rejalarni ishlab chiqishdagi ilgʻor yondashuvlar va boshqa qator mavzular boʻyicha taqdimotlar oʻtkazildi.
Ushbu taqdimotlar xorijiy va mahalliy mutaxassis va ekspertlar, shuningdek, Ispaniyaning “IDOM” va Janubiy Koreyaning “DOHWA” kompaniyalari ekspertlari tomonidan olib borildi.
Iqtisodiyot va moliya vazirligi
Axborot xizmati va kommunikatsiyalar boshqarmasi