O‘zbekiston Respublikasi Iqtisodiyot va moliya vazirligi

Uchrashuvda Jahon bankining Oʻzbekistondagi loyihalari rahbarlari, Iqtisodiyot va moliya vazirligi masʼul xodimlari, “Tadbirkorlikni rivojlantirish kompaniyasi” AJ vakillari hamda boshqa mutasaddilar ishtirok etdi.
 

Muloqot davomida xususiy sektorni rivojlantirish, kichik va oʻrta biznesni qoʻllab-quvvatlash, eksport salohiyatini oshirish, investitsiyalarni jalb qilish hamda aholi, ayniqsa, yoshlar uchun yangi va sifatli ish oʻrinlarini yaratish masalalari muhokama qilindi.
 

Tomonlar kichik va oʻrta biznes iqtisodiy oʻsishning muhim drayveri ekanini qayd etib, eksportga yoʻnaltirilgan korxonalarni qoʻllab-quvvatlash, ularning raqobatbardoshligini oshirish va tashqi bozorlarga chiqish imkoniyatlarini kengaytirish muhimligini taʼkidladi.
 

Uchrashuvda xalqaro moliya institutlari, davlat organlari va xususiy sektor ishtirokida shakllantirilayotgan “Kichik biznes va ish oʻrinlari koalitsiyasi” tashabbusining keyingi bosqichlari ham koʻrib chiqildi. Mazkur platforma tadbirkorlikni qoʻllab-quvvatlash sohasidagi dasturlar va resurslarni muvofiqlashtirish, tashabbuslar takrorlanishining oldini olish hamda kichik va oʻrta biznesni rivojlantirishga qaratilgan islohotlar samaradorligini oshirishga xizmat qiladi.
 

Koalitsiya doirasida biznes muhitini yaxshilash, moliyalashtirish imkoniyatlarini kengaytirish, grant mablagʻlari va texnik koʻmak dasturlaridan samarali foydalanish, xususiy investitsiyalarni jalb qilish hamda zarur infratuzilmani rivojlantirish boʻyicha hamkorlikni kuchaytirish masalalari muhokama qilindi.
 

Shuningdek, Jahon banki bilan hamkorlikda amalga oshirilayotgan “Ish oʻrinlari va iqtisodiy oʻsish uchun moliyalashtirish imkoniyatlarini kengaytirish” (FINGROW) loyihasining joriy holati va istiqboldagi rejalari muhokama qilindi. Loyiha doirasida tadbirkorlik subyektlarining moliyalashtirish imkoniyatlarini kengaytirish, kafillik mexanizmlari va “fondlar fondi” orqali innovatsion, energiya samarador va istiqbolli biznes tashabbuslarini qoʻllab-quvvatlash nazarda tutilgan.
 

Muzokaralar davomida “Sifatli ish oʻrinlari, investitsiyalar va inklyuziv transformatsiyani jadallashtirish” (SaBIIT) loyihasining konseptual yoʻnalishlari ham koʻrib chiqildi. Ushbu tashabbus yuqori oʻsish salohiyatiga ega startaplar, yangi eksportyorlar va modernizatsiyaga tayyor korxonalarni qoʻllab-quvvatlash, ularning mahsuldorligini oshirish hamda global qiymat zanjirlariga integratsiyalashuvini ragʻbatlantirishga qaratilgan.
 

Tomonlar Jahon bankining B-READY submilliy tadqiqoti doirasida amalga oshirilayotgan ishlar yuzasidan ham fikr almashdilar. Mazkur tadqiqot hududlarda biznes yuritish amaliyotini tahlil qilish, qurilishga ruxsat berish, xalqaro savdo va mulk huquqini roʻyxatdan oʻtkazish kabi yoʻnalishlarda mavjud tartib-taomillarni baholash hamda biznes muhitini yaxshilash boʻyicha amaliy takliflar ishlab chiqishga qaratilgan.
 

Shu bilan birga, raqamli texnologiyalar, sunʼiy intellekt, innovatsiyalar va yuqori qoʻshilgan qiymatga ega mahsulotlar ishlab chiqarishni rivojlantirish orqali milliy iqtisodiyotning raqobatbardoshligini oshirish masalalari boʻyicha ham fikr almashildi.
 

Uchrashuv yakunida tomonlar barqaror iqtisodiy rivojlanishni qoʻllab-quvvatlash, xususiy sektor va kichik biznes salohiyatini yanada oshirish hamda sifatli ish oʻrinlarini yaratishga qaratilgan hamkorlikni izchil davom ettirishga tayyor ekanliklarini bildirdi.

Iqtisodiyot va moliya vazirligi

Axborot xizmati va kommunikatsiyalar boshqarmasi