O‘zbekiston Respublikasi Iqtisodiyot va moliya vazirligi

Mazkur tadbir O‘zbekiston Respublikasi Prezidentining 2026-yil 11-fevraldagi “Startaplarni qo‘llab-quvvatlashning kompleks ekotizimini joriy etish chora-tadbirlari to‘g‘risida”gi PQ–59-son qarori ijrosini ta’minlash maqsadida o‘tkazildi.
 

Tadbirda sohani rivojlantirishga mas’ul vazirlik va idoralar, venchur jamg‘armalar vakillari, xalqaro moliya institutlari ekspertlari, jumladan, BMT Taraqqiyot dasturi mutaxassislari, shuningdek, Qoraqalpog‘iston Respublikasi, viloyatlar va Toshkent shahri hamda tuman va shahar hokimlarining raqamlashtirish va sun’iy intellekt bo‘yicha maslahatchilari, iqtisodiyot va moliya boshqarmalari o‘rinbosarlari hamda kichik va o‘rta biznesni rivojlantirish bo‘yicha mas’ul xodimlar ishtirok etdi.
 

Muhokamalar davomida “Startaplar to‘g‘risida”gi qonun loyihasi konsepsiyasida nazarda tutilayotgan asosiy yo‘nalishlar, jumladan:
 

— startap ekotizimi ishtirokchilarining huquqiy maqomi;
 

— startaplarni ro‘yxatdan o‘tkazish tartibi;
 

— venchur fondlar va investorlar huquqlari;
 

— startaplarni davlat tomonidan qo‘llab-quvvatlash mexanizmlari;
 

— intellektual mulkni himoya qilish;
 

— innovatsiyalarni tijoratlashtirish;
 

— hududlarda startap ekotizimini rivojlantirish masalalari muhokama qilindi.
 

Shuningdek, uchrashuv davomida “startap”, “startap loyiha”, “institutsional investor”, “venchur fond”, “biznes-angel”, “akselerator” va “inkubator” kabi asosiy tushunchalarni qonunchilikda mustahkamlash masalalariga alohida e’tibor qaratildi.
 

Tadbirning ikkinchi qismida hududlarda startap tashabbuslarini shakllantirish va amalga oshirish jarayonlarini muvofiqlashtirish bo‘yicha seminar-trening tashkil etilib, unda “IT Park”, “UzVC” Milliy venchur fondi hamda “Aloqa Ventures” vakillari tomonidan startap loyihalarni moliyalashtirish va rivojlantirish bo‘yicha taqdimotlar o‘tkazildi.
 

Yakunda startap ekotizimini rivojlantirish, hududlarda mavjud muammolar va ularning yechimlari yuzasidan bildirilgan takliflar ko‘rib chiqilib, tegishli tartibda o‘rganilishi ma’lum qilindi.

Iqtisodiyot va moliya vazirligi

Axborot xizmati va kommunikatsiyalar boshqarmasi