O‘zbekiston Respublikasi Iqtisodiyot va moliya vazirligi

Yuqori saviyada tashkil etilgan anjuman davlat xaridlari tizimini modernizatsiya qilish va raqamlashtirish asosida shaffof, shuningdek, samarali boshqaruv mexanizmlarini joriy etish, ekologik barqarorlikni ta’minlashga qaratilgan “yashil” xaridlar amaliyotini kengaytirish, sohada malakali kadrlarni tayyorlash, ularning ilg‘or kompetensiyasini shakllantirish hamda innovatsion ta’lim modellarini joriy etish masalalariga bagʻishlandi.
 

Konferensiya davlat boshqaruvi organlari, ilmiy doiralar va xalqaro hamjamiyat vakillari oʻrtasida ochiq muloqot platformasini yaratib, ilgʻor tajriba va ilmiy yondashuvlar almashinuvi uchun muhim maydon vazifasini oʻtadi. Tadbirda  Oʻzbekiston Respublikasi Iqtisodiyot va moliya vaziri oʻrinbosari, Raqobatni rivojlantirish va iste’molchilar huquqlarini himoya qilish qoʻmitasi raisi oʻrinbosari, Korrupsiyaga qarshi kurashish agentligi mas’ul xodimlari, Ekologiya va iqlim oʻzgarishi milliy qoʻmitasi vakillari, “Loyihalar va xaridlar samaradorligini oshirish markazi” davlat muassasasi rahbarlari, Sanoat kooperatsiyasi va davlat xaridlari agentligi mutaxassislari, xalqaro moliyaviy tashkilotlar ekspertlari hamda xalqaro moliyaviy institutlardan vakillar, shuningdek, oliy ta’lim muassasalari professor-oʻqituvchilari, yosh ilmiy tadqiqotchilar va sohada faoliyat olib boruvchi mas’ul shaxslar ishtirok etdi.
 

Anjumanda davlat xaridlari tizimini takomillashtirishning institutsional va huquqiy asoslari, “yashil” xaridlar mezonlarini joriy etishning nazariy va amaliy jihatlari, milliy ekologik yorliq tizimini rivojlantirish, raqamli texnologiyalar, jumladan, sun’iy intellekt vositalarini qoʻllash orqali xarid jarayonlarining shaffofligi va samaradorligini oshirish masalalari keng muhokama qilindi.
 

Xususan, ishtirokchilar tomonidan olib borilgan ma’ruzalarda ekologik mezonlarga asoslangan xaridlar tizimi atrof-muhitni muhofaza qilishi bilan birga, uzoq muddatli iqtisodiy samaradorlikni ta’minlashda ham muhim omil ekanligi ilmiy asoslangan holda yoritib berildi. Shu bilan birga, raqamli transformatsiya jarayonlari davlat xaridlari tizimini inson omilidan kelib chiqadigan xatarlardan xoli etish, korrupsiyaviy omillarni qisqartirish va real vaqt rejimida monitoring imkoniyatlarini kengaytirishga xizmat qilishi alohida qayd etildi.
 

Konferensiya doirasida davlat xaridlari tizimi uchun yuqori malakali kadrlar tayyorlash, zamonaviy bilim va ko‘nikmalarni rivojlantirish, innovatsion ta’lim modellarini amaliyotga keng joriy etish masalalariga alohida e’tibor qaratildi. Shuningdek, davlat xaridlari sohasida olib borilayotgan islohotlarni chuqur tahlil qilish, mavjud muammolarni aniqlash va ularning ilmiy asoslangan yechimlarini ishlab chiqish nuqtayi nazaridan muhim ahamiyat kasb etadi.
 

Tashkil etilgan anjumanning asosiy maqsadi davlat xaridlari tizimini kompleks takomillashtirish orqali budjet mablagʻlaridan foydalanish samaradorligini oshirish, barqaror iqtisodiy rivojlanish va ekologik muvozanatni ta’minlashga hissa qoʻshishdan iborat. 

Iqtisodiyot va moliya vazirligi

Axborot xizmati va kommunakatsiyalar boshqarmasi