O‘zbekiston Respublikasi Iqtisodiyot va moliya vazirligi

Jumladan, O‘zbekiston Respublikasi Prezidentining 2020-yil 24-fevraldagi PQ-4611-sonli “Moliyaviy hisobotning xalqaro standartlariga o‘tish bo‘yicha qo‘shimcha chora-tadbirlar to‘g‘risida”gi qarori bilan MHXSga o‘tishni jadallashtirish orqali xorijiy investorlarni zarur axborot muhiti bilan ta’minlash va xalqaro moliya bozorlariga kirish imkoniyatlari kengaytirildi, shuningdek, hisob va audit sohalari mutaxassislarini xalqaro standartlar bo‘yicha tayyorlash tizimi takomillashtirildi.

Mazkur qaror ijrosini ta’minlash maqsadida Iqtisodiyot va moliya vazirligi MHXSni joriy etish bo‘yicha vakolatli organ sifatida MHXSni amaliyotga qo‘llash jarayonini muvofiqlashtirish maqsadida MHXS Fondi bilan MHXS hujjatlarini davlat tiliga tarjima qilish huquqini olish uchun bitim imzoladi.

Jami 62 ta MHXS hujjati davlat tiliga tarjima qilinib, bugungi kunda tashkilotlar O‘zbekiston Respublikasi hududida qo‘llash uchun tan olingan moliyaviy hisobotning xalqaro standartlari va unga tushuntirishlar matni (2022-yil 9-dekabr, ro‘yxat raqami: 3400) asosida buxgalteriya hisobini tashkil etib, moliyaviy hisobotlarini tayyorlab kelmoqda.

Shuningdek, vazirlik Sertifikatlangan diplomli buxgalterlar xalqaro assotsiatsiyasi (ACCA, Buyuk Britaniya) bilan xalqaro ta’lim standartlari asosida MHXS bo‘yicha kadrlar tayyorlashga qaratilgan memorandum imzoladi. ACCA bilan o‘zaro hamkorlik jarayonida 19 dan ortiq o‘quv markazlari xalqaro akkreditatsiyadan muvaffaqiyatli o‘tdi. Bu esa MHXSga muvofiq o‘qitish sifatini tasdiqlaydi.

MHXS bo‘yicha mutaxassislarning mehnat bozoriga kirishi uchun shart-sharoitlarni yaxshilash maqsadida:

vazirlik tomonidan oliy ta’lim muassasalarining pedagog kadrlari va talabalari, davlat organi xodimlarining MHXSga o‘qitish va buxgalterlarning xalqaro sertifikatlari doirasida dastlabki ro‘yxatdan o‘tish va imtihon topshirish uchun ro‘yxatdan o‘tish xarajatlarini qoplab berish tizimi joriy etildi (bugungi kunga qadar 2 405 nafar talabgorga 5 910,8 mln so‘m qoplab berildi);

bugungi kunda buxgalterlarni xalqaro sertifikatlash doirasida ASSA – 71 ta, “MHXS bo‘yicha moliyaviy hisobot” (F7) fanidan topshirgan – 302 ta, DipIFR (ACCA) – 432 ta, CIPA, CPA – 60 dan ortiq jami 865 ga yaqin xalqaro sertifikatga ega mutaxassislar mavjud.

13 mingdan ortiq tinglovchilar (talabalar, o‘qituvchilar, buxgalterlar va moliyachilar) uchun bepul masofadan ta’lim onlayn platformalari (ifrs.academy va profimsfo.uz) yaratildi;

moliyaviy hisobot va auditning xalqaro standartlari bo‘yicha innovatsion malaka oshirish resurs markazi, shuningdek, Buxgalteriya hisobi va soliqlar bo‘yicha nodavlat malaka oshirish resurs markazi tashkil etildi;

MHXSni o‘zbek tilidagi ahamiyatini yanada oshirish uchun standartlar bo‘yicha bugungi kunga 30 ta bepul onlayn vebinar o‘tkazildi.

Shu bilan birgalikda, buxgalteriya hisobi sohasini tizimlashtirish, Moliyaviy hisobotning xalqaro standartlariga (MHXS) o‘tishni rag‘batlantirish va tadbirkorlik subyektlarining MHXSga o‘tishi uchun qo‘shimcha shart-sharoitlar yaratish, moliyaviy hisobotning tashqi sifat nazorati tizimlarini takomillashtirish, shuningdek, buxgalterlar va auditorlar kasbining huquqiy maqomi va nufuzini mustahkamlash, ularning kasbiy odob-axloq talablariga rioya qilishi, buxgalterlik va auditorlik xizmatlari sifatini xalqaro standartlar asosida ta’minlashi, buxgalteriya hisobi va audit sohasini raqamlashtirish orqali rivojlantirish bugungi kundagi dolzarb masalalar hisoblanadi.

Iqtisodiyot va moliya vazirligi

Axborot xizmati