O‘zbekiston Respublikasi Iqtisodiyot va moliya vazirligi

Mazkur kelishuv Xalqaro barqarorlik standartlari kengashi (ISSB) tomonidan ishlab chiqilgan Barqarorlik standartlarini O‘zbekistonda to‘liq joriy etish uchun mustahkam huquqiy va institutsional asos yaratadi. Bu esa mamlakatimizni global moliyaviy axborot tizimining ajralmas qismiga aylantirish yo‘lidagi muhim qadam sifatida baholanmoqda.
 

Ushbu tashabbus O‘zbekiston Respublikasi Prezidentining 2025-yil 15-sentyabrdagi PQ-282-son qarori bilan belgilangan vazifalarning amaliy ijrosidir. Mazkur qarorga muvofiq, 2027-yil 1-yanvardan boshlab jamoat ahamiyatiga ega tashkilotlar tomonidan MHXSning barqarorlik standartlarini joriy etish belgilangan. Endilikda imzolangan shartnoma ushbu jarayonni tezlashtirish, uni xalqaro talablar darajasida va tizimli ravishda amalga oshirish imkonini beradi.
 

Barqarorlik standartlari bugungi kunda jahon moliya tizimining eng muhim elementlaridan biriga aylanib bormoqda. Ular orqali kompaniyalar nafaqat moliyaviy natijalarini, balki ekologik, ijtimoiy va boshqaruv omillariga oid ma’lumotlarni ham oshkor etadi. Bu esa investorlar, kreditorlar va boshqa manfaatdor tomonlar uchun yanada to‘liq va ishonchli axborot manbasini yaratadi. Ayniqsa, iqlim o‘zgarishi, resurslardan oqilona foydalanish va ijtimoiy mas’uliyat kabi global muammolar kuchayib borayotgan bir paytda bunday standartlarning ahamiyati yanada ortmoqda. Mamlakatimiz Barqarorlik standartlarini qabul qiluvchi yurisdiksiyalar ishchi guruhiga (Jurisdictional Adopters Working Group – JAWG) a’zo bo‘lib, mazkur yo‘nalishda “kuzatuvchi” emas, balki faol ishtirok etuvchi davlat sifatida o‘z pozitsiyasini namoyon etmoqda.
 

Shu tariqa, imzolangan shartnoma nafaqat texnik yoki huquqiy hujjat, balki O‘zbekistonning ochiq, shaffof va barqaror iqtisodiyot sari qat’iy qadam tashlayotganining yaqqol ifodasidir. Bu esa yaqin yillarda investorlar uchun shaffoflikni oshirish orqali mamlakatimizning investitsion jozibadorligini kuchaytirish, xalqaro reytinglardagi o‘rnini yaxshilash va uzoq muddatli iqtisodiy barqarorlikni ta’minlashda muhim omil bo‘lib xizmat qiladi.

Iqtisodiyot va moliya vazirligi

Axborot xizmati va kommunikatsiyalar boshqarmasi