O‘zbekiston Respublikasi Iqtisodiyot va moliya vazirligi

Uchrashuvda Jahon bankining Yevropa va Markaziy Osiyo mintaqasida barqaror rivojlanish bo‘yicha direktori Sameh Vahba hamda O‘zbekiston Respublikasi Markaziy banki raisi Timur Ishmetov va boshqa mas’ul vakillar ishtirok etdi.

Uchrashuv davomida tomonlar joriy makroiqtisodiy tendensiyalar, jumladan iqtisodiy o‘sish sur’atlari, inflatsiya darajasi, tashqi sektor holati va budjet siyosati parametrlari, shuningdek, o‘rta muddatli ijtimoiy-iqtisodiy rivojlanish prognozlarini muhokama qildilar.

Jahon banki ishtirokida amalga oshirilayotgan qo‘shma loyihalarning borishi, jumladan ta’lim, sog‘liqni saqlash, energetika, suv ta’minoti, qishloq xo‘jaligi va transport sohalaridagi loyihalar, shuningdek, ularning samaradorligini oshirish choralari ko‘rib chiqildi.

Shuningdek, budjetni qo‘llab-quvvatlash dasturlarini amalga oshirish, infratuzilma loyihalarini rivojlantirish, moliyalashtirish vositalarini takomillashtirish, shuningdek, kichik va o‘rta biznes, ayollar tadbirkorligi va yoshlar tashabbuslarini qo‘llab-quvvatlash masalalari muhokama qilindi.

Raqamli transformatsiya, zamonaviy texnologiyalar, jumladan sun’iy intellekt elementlarini joriy etish, shuningdek, institutsional rivojlanish yo‘nalishlari alohida ko‘rib chiqildi.

Jahon banki guruhi va Xalqaro valyuta jamg‘armasining yillik bahorgi yig‘ilishlari doirasida qator investitsiya loyihalarini amalga oshirish bo‘yicha bitimlar imzolandi.

Xususan, “Bishkek–Dushanbe–Termiz” xalqaro avtomobil yo‘lining M41 uchastkasini rekonstruksiya qilish loyihasi bo‘yicha kelishuvlarga erishildi. Loyiha doirasida qariyb 97 km yo‘l zamonaviy xalqaro standartlarga mos ravishda rekonstruksiya qilinadi, jumladan yo‘l to‘rt polosagacha kengaytiriladi hamda ko‘prik va yo‘l o‘tkazgichlar quriladi.

Shuningdek, REMIT dasturi doirasida mintaqaviy energetika infratuzilmasini rivojlantirish loyihasi bo‘yicha hujjatlar imzolandi. Mazkur loyiha 220 kV kuchlanishdagi yangi elektr uzatish liniyalarini qurish va podstansiyalarni modernizatsiya qilishni nazarda tutadi hamda Farg‘ona vodiysida elektr ta’minoti ishonchliligini oshirishga xizmat qiladi.

Bundan tashqari, FINGROW loyihasi bo‘yicha bitimlar rasmiylashtirildi. Ushbu loyiha kichik va o‘rta biznes subyektlarining moliyalashtirish imkoniyatlarini kengaytirish, jumladan kafillik mexanizmlarini joriy etish va “yashil” hamda energiya samarador loyihalarni qo‘llab-quvvatlashga qaratilgan.

Mazkur tashabbuslarning amalga oshirilishi transport va energetika infratuzilmasini yanada rivojlantirish, moliyaviy resurslarga kirishni kengaytirish, tadbirkorlik faolligini rag‘batlantirish hamda barqaror iqtisodiy o‘sishni ta’minlashga xizmat qiladi.

Uchrashuv yakunida tomonlar strategik hamkorlikni yanada kengaytirish hamda ustuvor yo‘nalishlar bo‘yicha hamkorlikni davom ettirishga kelishib oldi.

Iqtisodiyot va moliya vazirligi

Axborot xizmati va kommunikatsiyalar boshqarmasi