2026-yil 3-fevral

Sog‘liqni saqlash vazirligi  Iqtisodiyot va moliya vazirligi ko‘magida Farg‘ona viloyatida ko‘p tarmoqli shifoxona tashkil etish bo‘yicha davlat-xususiy sheriklik loyihasini amalga oshirish doirasida (keyingi o‘rinlarda — Loyiha) tender jarayonini yakunladi.

Loyiha O‘zbekiston Respublikasi Prezidentining 2024–2030-yillarda O‘zbekiston Respublikasida davlat-xususiy sheriklikni rivojlantirish chora-tadbirlari to‘g‘risidagi 2024-yil 30-avgustdagi PQ-308-son qaroriga muvofiq Sog‘liqni saqlash vazirligi tashabbusi bilan amalga oshirilmoqda.

Tender g‘olibi  sifatida VISION INTERNATIONAL INVESTMENT COMPANY (Saudiya Arabistoni) - KOC CONSTRUCTION MEKANIK ELEKTRIK MCHJ FE (O‘zbekiston)- REKEEP (Italiya) kompaniyalari konsorsiumi e’lon qilindi. Konsorsium tomonidan taqdim etilgan hujjatlar barcha texnik talablarga javob bergan boʻlib, moliyaviy jihatdan eng past taklifni taqdim etdi.

Loyiha doirasida tender g‘olibi Farg‘ona viloyatida 800 o‘rinli zamonaviy ko‘p tarmoqli shifoxonani loyihalash, moliyalashtirish, qurish, xalqaro standartlarga muvofiq zamonaviy tibbiy asbob-uskunalar bilan jihozlash hamda 20 yil davomida texnik ekspluatatsiyasini ta’minlash majburiyatini oladi.

Farg‘ona viloyatida ko‘p tarmoqli shifoxona qurish bo‘yicha DXSh loyihasini amalga oshirish mintaqa hamda unga tutash viloyatlar aholisi uchun kardiojarrohlik, neyroxirurgiya va organ transplantatsiyasini o‘z ichiga olgan zamonaviy yuqori texnologiyali uchinchi darajali tibbiy xizmatlardan foydalanish imkoniyatini ta’minlaydi.

Loyiha doirasida viloyatdagi mavjud 5 ta tibbiyot muassasasini bir joyda birlashtirish hamda ularni ilg‘or diagnostika va davolash infratuzilmasi bilan jihozlash, resurslardan foydalanish samaradorligini oshiradi, xizmatlar sifatini yaxshilaydi va bemorlarning mintaqa yoki mamlakat tashqarisiga chiqish zaruratini kamaytiradi.

Mazkur loyiha davlat va xususiy sektorning sog‘liqni saqlash sohasidagi muvaffaqiyatli hamkorligining pilot loyihasi bo‘lib, O‘zbekistonning boshqa hududlarida zamonaviy tibbiyot majmualarini rivojlantirish uchun model yaratadi.

Xalqaro tender jarayonida jami o‘nta kompaniya ishtirok etdi, ulardan sakkiztasi dastlabki malakadan o‘tkazildi hamda ishtirokchilardan jumladan: tender g‘olibidan tashqari Meridiam (Fransiya), Ronesans (Turkiya) konsorsiumi, Plenary (BAA), YDA Group (Turkiya), Fuad Alganim Holding (Quvayt) konsorsiumlaridan texnik va moliyaviy takliflar olindi.

Kompaniyalar uchun asosiy talablar qat’iy bo‘lib, tajriba, moliyaviy ko‘rsatkichlar va boshqa mezonlarni o‘z ichiga oladi.