Mazkur islohotlar Respublikada moliyaviy hisobot tizimini Moliyaviy hisobotning xalqaro standartlariga (IFRS, IAS, IFRS for SMEs) yaqinlashtirish, hisobot maʼlumotlarining shaffofligi, taqqoslanuvchanligi va ishonchliligini oshirishga xizmat qiladi.

Yangi standartlar – yagona va zamonaviy yondashuv tamoyili asosida 2026–2027-yillar davomida 8 ta yoʻnalish boʻyicha jami 30 dan ortiq MHMS ishlab chiqilishi rejalashtirilgan boʻlib (MHMS roʻyxati), ular quyidagi asosiy yoʻnalishlarni qamrab oladi:

·moliyaviy hisobotning konseptual asoslari va umumiy qoidalari;

·moliyaviy hisobot tarkibi va komponentlari;

·aktivlar, majburiyatlar va kapital hisobi;

·moliyaviy instrumentlar;

·daromadlar, xarajatlar va moliyaviy natijalar;

·ijara, xodimlarga toʻlovlar, foyda soligʻi kabi muhim masalalar;

·kichik tadbirkorlik subyektlari uchun soddalashtirilgan hisob;

·qishloq xoʻjaligi, sugʻurta, davlat-xususiy sheriklik kabi sohaviy standartlar.

Yangi MHMSlar amaldagi Buxgalteriya hisobining milliy standartlarini (BHMS) yagona tizimga birlashtiradi, ayrim eskirgan normalarni bekor qiladi hamda avval mavjud boʻlmagan, ammo xalqaro amaliyotda keng qoʻllaniladigan standartlarni joriy etadi.

Moliyaviy hisobotning milliy standartlarini joriy etish orqali biznes va investorlar uchun yangi imkoniyatlar yaratiladi. Jumladan:

·xoʻjalik yurituvchi subyektlar uchun hisob yuritish qoidalari aniq va tushunarli boʻladi;

·investorlar, kreditorlar va davlat organlari uchun moliyaviy axborot sifati oshadi;

·xalqaro moliya bozorlari bilan integratsiya jarayonlari jadallashadi;

·kichik biznes va nodavlat notijorat tashkilotlari uchun soddalashtirilgan hisob mexanizmlari yaratiladi.

Iqtisodiyot va moliya vazirligi MHMS loyihalarini ochiqlik va jamoatchilik ishtiroki asosida ishlab chiqadi. Bunda, professional buxgalterlar, auditorlar, tadbirkorlik subyektlari, taʼlim muassasalari va xalqaro ekspertlar, salohiyatli ilmiy kadrlar jumladan buxgalteriya hisobi va audit boʻyicha Metodologik kengash ishtirokini taʼminlaydi. Standartlar loyihalari bosqichma-bosqich jamoatchilik muhokamasiga qoʻyiladi.

Iqtisodiyot va moliya vazirligi barcha tadbirkorlik subyektlari, manfaatdor vazirlik va idoralar, jamoat tashkilotlarini ushbu jarayonda faol ishtirok etishga, taklif va mulohazalar bildirishga chaqiradi.

Iqtisodiyot va moliya vazirligi

Axborot xizmati va kommunikatsiyalar boshqarmasi