“O‘zbekistonda yashil rivojlanishni moliyalashtirish: imkoniyatlar va istiqbollar” mavzusida davra suhbati bo‘lib o‘tdi
2025-11-20 12:55:00 / Vazirlik yangiliklari
Tadbirda sohaga taalluqli vazirlik va idoralar vakillari, xalqaro tashkilotlarning mamlakatimizdagi vakolatxonalari rahbarlari va ekspertlari, fuqarolik jamiyati institutlari, xususiy sektor va ilmiy-tadqiqot muassasalari vakillari ishtirok etdi.
Davra suhbatini Iqtisodiyot va moliya vaziri o‘rinbosari Umid Abidxadjayev, Yevropa Ittifoqining O‘zbekistondagi elchisi Toivo Klaar, Fransiya taraqqiyot agentligining Toshkentdagi vakolatxonasi rahbari Olivier Grandvoinet hamda BMTTDning O‘zbekistondagi doimiy vakili Akiko Fujii ochib berdi. Ochilish qismida yashil iqtisodiyot sohasida, xususan yashil moliyalashtirishni takomillashtirish bo‘yicha olib borilayotgan jadal islohotlar, yangi tashabbuslar hamda xalqaro hamkorlar bilan amalga oshirilayotgan loyihalar va natijalar yuzasidan ijobiy fikrlar bildirildi.
Shuningdek, O‘zbekistonda yashil moliyalashtirish tizimini takomillashtirish bo‘yicha milliy Dastur yuzasidan amalga oshirilgan ishlar va istiqboldagi vazifalar to‘g‘risida Iqtisodiyot va moliya vazirligi vakili tomonidan batafsil ma’lumot berildi.
Tadbirning asosiy qismida BMTTD vakillari tomonidan ishlab chiqilgan muhim hujjat – O‘zbekistonda yashil rivojlanishni moliyalashtirishni baholash hisoboti (Green Development Finance Assessment for Uzbekistan) taqdimot qilindi. Taqdimotda yashil moliyalashtirish sohasida, xususan yashil byudjetlashtirish tizimi, yashil obligatsiyalar, milliy yashil taksonomiya tizimi hamda yashil investitsiyalarni jalb qilish va monitoringini yuritish bo‘yicha muhim ma’lumot va tavsiyalar berildi.
Tadbir so‘ngida, ishtirokchilar va ekspertlar o‘rtasida mazkur sohani yanada rivojlantirish bo‘yicha fikr-mulohazalar bildirilib, kelgusidagi vazifalar belgilab olindi.
Iqtisodiyot va moliya vazirligi
Axborot xizmati