“Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonun Senatorlar tomonidan maʼqullandi.
2026-09-10 15:55:00 / Vazirlik yangiliklari
Avval xabar berilganidek, Adliya vazirligi tomonidan ishlab chiqilgan nizosiz ishlarni hal etish tartib-taomillarini takomillashtirishga qaratilgan qonun Oliy Majlis Senatining Sud-huquq masalalari va korrupsiyaga qarshi kurashish qoʻmitasining navbatdagi majlisida ushbu Qonun koʻrib chiqilgan edi.
Bugun Oliy Majlis Senatining 19-yalpi majlisida mazkur Qonun muhokama qilindi.
Qonun bilan Fuqarolik va Iqtisodiy protsessual kodekslariga, “Sud hujjatlari va boshqa organlar hujjatlarini ijro etish toʻgʻrisida”gi hamda “Davlat boji toʻgʻrisida”gi qonunlarga nizosiz talablar boʻyicha sud buyrugʻini chiqarish doirasini qisqartirishni, notariat faoliyatiga axborot-kommunikatsiya texnologiyalarini keng jalb qilishni va ijro xatlari uchun undiriladigan davlat bojlarini maqbullashtirishni nazarda tutuvchi qoʻshimcha va oʻzgartirishlar kiritilmoqda.Kiritilayotgan o‘zgartirishlarga koʻra, qonunda belgilangan mezonlarga mos, BHMning ming baravarigacha boʻlgan nizosiz talablar boʻyicha notariusga murojaat qilish imkoniyati kengaymoqda. Bu orqali bunday talablarni sud tartibiga murojaat qilmasdan, notarius orqali rasmiylashtirish va ijroga qaratish mexanizmi soddalashtiriladi.
Shuningdek, notariuslar tomonidan rasmiylashtiriladigan ijro xatlarini elektron shaklda ijro organlariga toʻgʻridan-toʻgʻri yuborish imkoniyati yaratilmoqda.
Bu o‘z navbatida hujjatlarni qogʻoz shaklida taqdim etish bilan bogʻliq ortiqcha jarayonlarni qisqartirishga xizmat qiladi.
Muhokamada mazkur oʻzgartishlar sudlar ish yuklamasini kamaytirish, fuqarolar va tadbirkorlik subyektlarining vaqti va xarajatlarini tejash, nizosiz talablarni tezkor rasmiylashtirish hamda ijro samaradorligini oshirishga xizmat qilishi taʼkidlandi.
Muhokamalar yakuniga ko‘ra mazkur Qonun Senatorlar tomonidan maʼqullandi.