O‘zbekiston Respublikasi Vazirlar Mahkamasining 2026-yil 9-iyuldagi 375-son qarori ijrosi doirasida Toshkent davlat yuridik universiteti, Savdo-sanoat palatasi hamda “Hunarmand” uyushmasi muassisligida tashkil etilgan “oriGIn Uzbekistan” muassasa shaklidagi nodavlat notijorat tashkiloti davlat ro‘yxatidan o‘tkazildi.

Tashkilotning asosiy maqsadi geografik ko‘rsatkichlarni rivojlantirish va keng targ‘ib qilish, milliy mahsulotlarni xorijiy bozorlarda ilgari surish, shuningdek, tadbirkorlik subyektlari va hunarmandlarga geografik ko‘rsatkichlarni aniqlash, davlat ro‘yxatidan o‘tkazish hamda tijoratlashtirish jarayonlarida huquqiy va uslubiy ko‘mak ko‘rsatishdan iborat.

“oriGIn Uzbekistan” faoliyati doirasida:

✅ istiqbolli geografik ko‘rsatkichlarni aniqlash va ularni ro‘yxatdan o‘tkazishga ko‘maklashish;
✅milliy geografik ko‘rsatkichlarni mamlakatimizda va xorijda targ‘ib qilish;
✅geografik ko‘rsatkichlardan foydalanish bo‘yicha tadbirkorlar birlashmalarini rivojlantirish;
✅milliy mahsulotlarni tijoratlashtirish va xalqaro bozorlarga olib chiqishga ko‘maklashish;
✅geografik ko‘rsatkichlarga bag‘ishlangan festival, ko‘rgazma-yarmarka va boshqa targ‘ibot tadbirlarini tashkil etish nazarda tutilgan.

“oriGIn Uzbekistan” milliy mahsulotlarning o‘ziga xosligi va kelib chiqishini xalqaro miqyosda tanitish, ularning iqtisodiy qiymatini oshirish hamda “Made in Uzbekistan” brendining nufuzini yanada mustahkamlashga xizmat qiladi.