Yuridik shaxslar uchun elektron ishonchnoma rasmiylashtirish imkoniyati yaratildi
2026-07-20 16:00:00 / Vazirlik yangiliklari
Adliya vazirligi tashabbusi bilan vakolat.adliya.uz tizimida yuridik shaxslar uchun avtotransport moduli joriy etildi.
Endilikda yuridik shaxslar o‘ziga tegishli yoki ijara shartnomasi asosida foydalanayotgan avtotransport vositalarini boshqarish uchun ishonchnomalarni vakolat.adliya.uz hamda new.birdarcha.uz axborot tizimlari orqali elektron shaklda rasmiylashtirishi mumkin.
vakolat.adliya.uz hamda Ichki ishlar vazirligining Yo‘l harakati xavfsizligi xizmati axborot tizimlari o‘zaro integratsiya qilingan.
Shu bois rasmiylashtirilgan elektron ishonchnomalar real vaqt rejimida yo‘l-patrul xizmati inspektorlarining planshetlarida aks etadi. Bu esa ishonchnomalarni tezkor tekshirish, ortiqcha hujjat aylanishini kamaytirish hamda fuqarolar va tadbirkorlik subyektlari uchun yanada qulay xizmat ko‘rsatishga xizmat qiladi.