«Ўзаэронавигация» Марказий Осиёда биринчи бўлиб, Green ATM аккредитациясини олди
2025-09-11 11:00:00 / Янгиликлар
Қозоғистоннинг Олмаота шаҳрида CANSO Eurasia доирасида ташкил этилган мазкур йиғилишда томонлар минтақада парвозлар хавфсизлиги ва самарадорлигини оширишга қаратилган кўп томонлама ҳамкорликни ривожлантириш масалаларини муҳокама этишди.
Шунингдек, аэронавигация соҳасида инновацион ечимларни жорий этиш ва барқарор ривожланиш тамойилларига алоҳида эътибор қаратилди.
Йиғилиш якунларига кўра, «Ўзаэронавигация» Маркази глобал Green ATM ташаббуси доирасида 1-даражали аккредитация сертификатига сазовор бўлди. Шуни алоҳида таъкидлаш жоиз, дунёда Green ATM аккредитациясига эга бўлган давлатлар сони атиги 12 та бўлиб, «Ўзаэронавигация» Маркази ҳам эндиликда улар қаторида ўрин олди.
Бу ютуқ мамлакатимиз транспорт тизимида экологик барқарор ривожланиш ва «яшил» технологиялар фаол жорий этилаётганининг ёрқин ифодасидир. Бу эса, ўз ўрнида миллий устувор йўналишларимизнинг глобал барқарор ривожланиш тенденцияларига уйғунлигини кўрсатади.