Ўзбекистон ва Ўмон ўртасида транспорт-логистика соҳасидаги ҳамкорликни кенгайтириш масалалари муҳокама қилинди
2026-11-17 20:00:00 / Янгиликлар
Учрашувда икки мамлакат ўртасидаги транспорт соҳасидаги мавжуд ҳамкорлик ҳолати, эришилган натижалар ҳамда истиқболдаги устувор йўналишлар юзасидан фикр алмашилди.
Хусусан, Ўмон томони Ўзбекистон билан транспорт-логистика соҳасидаги ҳамкорликни янада кенгайтиришдан манфаатдор эканини билдирди. Шу муносабат билан икки мамлакат ўртасида авиақатновлар сонини кўпайтириш, янги йўналишларда қатновларни йўлга қўйиш ҳамда ўзаро товар айирбошлаш ҳажмини оширишда ҳаво юк ташувлари хизматларидан самарали фойдаланиш масалалари муҳокама қилинди.
Шунингдек, транспорт соҳасидаги ўзаро алоқаларни мустаҳкамлаш, ҳамкорликнинг ҳуқуқий асосларини кенгайтириш мақсадида янги битим ва келишувларни ишлаб чиқиш ҳамда имзолаш, шунингдек, икки мамлакат учун манфаатли қўшма лойиҳаларни амалга ошириш истиқболлари кўриб чиқилди.
Учрашув давомида Ўмон томони Ўзбекистон билан савдо-иқтисодий алоқаларни ривожлантириш, мамлакатимиз бозорида фаолият юритиш ва мавжуд имкониятлардан фойдаланишга катта қизиқиш билдираётганини алоҳида таъкидлади.
Мулоқот якунида томонлар транспорт ва логистика йўналишларидаги ҳамкорликни изчил ривожлантириш, янги ташаббусларни амалий лойиҳаларга айлантириш ҳамда ўзаро манфаатли алоқаларни мустаҳкамлаш борасида ҳамкорликни давом эттиришга келишиб олдилар.
