2026-йилнинг 12-мартида “Янги Бухоро халқаро аэропортини қуриш ва бошқарувга бериш” ДХШ лойиҳасини “Қуриш-топшириш-бошқариш” (Build-Transfer-Operate - BTO) модели бўйича амалга ошириш учун очиқ тендер эълон қилинган эди. Тендер икки босқичда бўлиб ўтди: малака сўрови (RFQ) ва таклифлар сўрови (RFP). Илгари хабар берилганидек, олтита компания тендернинг иккинчи якуний босқичига ўтган, ва унинг натижасида Идоралараро тендер комиссияси томонидан ғолиб аниқланди.

Таъкидлаш жоизки, ДХШ лойиҳаси янги аэропортни қуриш ва бошқариш лойиҳасини биргаликда амалга оширишни назарда тутади. Хусусий шерик соатига 1 200 йўловчига хизмат кўрсатиш қувватига эга янги йўловчи терминали, вокзалолди майдони, автотураргоҳ ва тегишли инфратузилмани қуриш ҳамда бошқариш ишларини амалга оширади.

Давлат шериги аэродром мажмуасини (учиш-қўниш йўлаги, перрон) қуриш ва бошқариш учун жавобгарликни ўзига олади. Кейинги босқичда умумий муддати 23 йил, шу жумладан 3 йилгача қурилиш даврини ўз ичига олган ДХШ тўғрисидаги битим тузилиши кўзда тутилган.

Ғолиб консорциум таркибига кирган компаниялар дунёнинг турли мамлакатларида аэропортлар ва йирик инфратузилма обектларини қуриш ҳамда бошқаришда катта тажрибага эга: Лимак Приштина (Косово) ва Дакар (Сенегал) халқаро аэропортларини бошқаради, ҳамда Истанбул аэропортини қуришда иштирок этган ва Қоҳира (Миср) аэропортидан сўнг Қувайт халқаро аэропортининг янги терминалини қурмоқда. HBK Contracting компанияси эса 2022-йилги футбол бўйича жаҳон чемпионати финали ўтган Қатардаги “Лусаил” стадиони қурилишининг бош пудратчиси бўлган.

Эслатиб ўтамиз, “Янги Бухоро” халқаро аэропортини қуриш ва бошқариш бўйича ДХШ лойиҳаси Ўзбекистон Республикаси Президентининг 2024-йил 30-августдаги ПҚ-308-сон қарорига асосан “Uzbekistan Airports” АЖ томонидан Транспорт вазирлиги ҳамда Иқтисодиёт ва молия вазирлиги билан ҳамкорликда амалга оширилмоқда.