Ўзбекистон ва Тожикистон ўртасида транспорт ва транзит соҳасидаги ҳамкорликни кенгайтириш масалалари муҳокама қилинди
2026-11-11 16:00:00 / Янгиликлар
Музокаралар давомида икки мамлакат ўртасида транспорт-логистика соҳасидаги ҳамкорликни янада ривожлантириш, ўзаро юк ташувлари ҳажмини ошириш ҳамда экспорт ва транзит жараёнларини соддалаштириш масалалари муҳокама қилинди.
Хусусан, Ўзбекистондан Тожикистонга қурилиш материалларини автомобиль транспортида ташиш учун ундириладиган йиғимларни мақбуллаштириш, темир йўл орқали етказиб берилаётган экспорт юкларини Тожикистон ҳудудида вагонлардан тушириш жараёнларини тезлаштириш ва мавжуд муаммоларни бартараф этиш масалаларига алоҳида эътибор қаратилди.
Шунингдек, икки давлат ўртасидаги чегара-ўтказиш пунктларининг ўтказувчанлик қобилиятини ошириш, юк ташувлари учун янада қулай шарт-шароитлар яратиш юзасидан фикр алмашилди.
Учрашув якунида Ўзбекистондан Тожикистонга экспорт ҳажмини кўпайтириш, юк ташиш жараёнларини жадаллаштириш ҳамда мавжуд тўсиқларни бартараф этишга қаратилган зарур чора-тадбирларни қисқа муддатларда амалга ошириш бўйича келишувга эришилди.