Ўзбекистон–Қозоғистон чегараси орқали халқаро юк ташиш жараёнларини такомиллаштириш масалалари муҳокама қилинди
2026-11-06 11:50:00 / Янгиликлар
Учрашув давомида Ўзбекистон–Қозоғистон давлат чегараси орқали халқаро автомобиль транспортида юк ташиш жараёнида юзага келаётган долзарб масалалар, чегара ўтказиш пунктлари фаолияти самарадорлигини ошириш ҳамда миллий ташувчилар учун қулай шарт-шароитлар яратиш юзасидан атрофлича фикр алмашилди.
Хусусан, юк автотранспорт воситаларининг чегарадан ўтиш жараёнларини соддалаштириш, кутиш вақтларини қисқартириш, ташувлар узлуксизлигини таъминлаш ҳамда мавжуд муаммоларни тезкор ҳал этиш масалаларига алоҳида эътибор қаратилди.
Шунингдек, учрашувда миллий ташувчилар ва тадбиркорлик субъектлари вакилларининг таклиф ҳамда мурожаатлари тингланиб, улар томонидан кўтарилган масалалар юзасидан масъул вазирлик ва идоралар иштирокида муҳокамалар ўтказилди.
Мулоқот давомида чегара ўтказиш пунктларидаги жараёнларни янада такомиллаштириш, ташувчилар фаолиятида юзага келаётган тўсиқларни бартараф этиш ҳамда масъул ташкилотлар ўртасидаги идоралараро ҳамкорликни кучайтириш бўйича таклифлар кўриб чиқилди.
Транспорт вазирлиги томонидан халқаро автомобиль ташувлари учун қулай шароитлар яратиш, миллий ташувчилар манфаатларини қўллаб-қувватлаш ҳамда чегара орқали юк ташиш жараёнларининг самарадорлигини оширишга қаратилган ишлар изчил давом эттирилмоқда.