РАСМИЙ МУНОСАБАТ
2026-11-05 15:00:00 / Янгиликлар
Айни вақтда пойтахтимизнинг Шаҳрисабз, Амир Темур шоҳ кўчаси ҳамда Янги Сергели кўчаларида умумий узунлиги 5,09 км бўлган жамоат транспорти учун алоҳида ажратилган йўлаклар (БРТ) ташкил этиш ва капитал таъмирлаш ишлари олиб борилмоқда.
Хусусан, Шаҳрисабз кўчасининг 1 км, Амир Темур шоҳ кўчасининг 2,73 км (биринчи босқич 1,43 км, иккинчи босқич 1,3 км) ҳамда Янги Сергели кўчасининг 1,36 км узунликдаги қисмларида қурилиш-монтаж ишлари амалга оширилмоқда.
Мазкур қурилиш-монтаж ишлари муносабати билан айрим йўл участкаларида транспорт воситалари ҳаракатига вақтинчалик чекловлар жорий этилгани шаҳарнинг қатор кўчаларида тирбандликларнинг ортишига сабаб бўлмоқда.
Айниқса, эрталабки ва кечки тиғиз соатларда транспорт воситалари оқимининг ортиши натижасида автобусларнинг белгиланган ҳаракат жадвали ва интервалларига риоя этишида кечикишлар кузатилмоқда.
Бу эса айрим йўналишларда автобуслар орасидаги ҳаракат интервалининг узайишига ҳамда йўловчиларнинг бекатларда кутиш вақти ортишига сабаб бўлмоқда.
Қурилиш-монтаж ишлари якунланиб, йўлларда транспорт воситаларининг одатий ҳаракати тикланиши билан мавжуд тирбандликлар камаяди, автобусларнинг ҳаракат интерваллари эса белгиланган жадвал асосида барқарорлашади.