Ўзбекистон Республикаси Транспорт вазирлиги

Унда Ўзбекистон, Қозоғистон, Қирғизистон, Тожикистон, Туркманистон ва Хитой авиация маъмуриятлари ҳамда соҳа вакиллари иштирок этмоқда. Конференция доирасида минтақавий авиақатновларни ривожлантириш, аввал эришилган келишувларни амалга ошириш ва ҳамкорликнинг янги истиқболли йўналишларини белгилаш масалалари муҳокама қилинмоқда.

Тадбирни Ўзбекистон Республикаси Транспорт вазирлиги ҳузуридаги Фуқаро авиацияси агентлиги директори Тоҳир Назаров очиб берди.

У ўз нутқида Ўзбекистон учун C5+1 формати алоҳида аҳамиятга эга эканини таъкидлаб, мазкур мулоқот майдони Марказий Осиё давлатлари ва Хитой ўртасидаги шериклик муносабатларини мустаҳкамлаш, авиақатновларни ривожлантириш ҳамда минтақанинг транспорт боғлиқлигини оширишда муҳим ўрин тутишини қайд этди.

Шунингдек, Ўзбекистон томонидан фуқаро авиацияси соҳасида ҳамкорликни янада кенгайтиришга қаратилган қатор устувор ташаббуслар илгари сурилди.

Авиақатновлар географиясини кенгайтириш

Мамлакатлар ўртасида янги авиа йўналишларни йўлга қўйиш, мавжуд йўналишларда парвозлар частотасини ошириш, йўловчи ва юк ташиш ҳажмларини кўпайтириш, шунингдек, авиакомпаниялар ўртасида тижорат ҳамкорлигини ривожлантириш муҳим вазифалар сифатида белгиланди.

Парвозлар хавфсизлигини таъминлаш

Давлат назорати, ИКАО стандартларини жорий этиш ва парвозлар хавфсизлигини бошқариш бўйича тажриба алмашиш, қўшма ўқув тадбирларини ташкил этиш ҳамда авиация инспекторларининг малакасини ошириш масалаларига алоҳида эътибор қаратилди.

Аэронавигация соҳасида ҳамкорликни кучайтириш

Халқаро ҳаво йўналишларини мақбуллаштириш, ҳаво ҳудудидан самарали фойдаланиш, замонавий технологияларни жорий этиш ва малакали мутахассислар тайёрлаш бўйича мамлакатлар аэронавигация хизматлари ўртасидаги профессионал мулоқотни фаоллаштириш таклиф этилди.

Кадрлар салоҳияти ва рақамлаштириш

Мутахассислар алмашинуви, стажировкалар ва қўшма ўқув дастурларини ташкил этиш, авиация соҳасини давлат томонидан тартибга солиш ҳамда авиация ташкилотлари фаолиятига рақамли ечимларни кенг жорий этиш борасида тажриба алмашиш муҳимлиги таъкидланди.

Шу билан бирга, C5+1 формати доирасидаги истиқболли ташаббусларни ягона устувор йўналишлар рўйхатига бирлаштириш ва уларни амалга ошириш бўйича кейинги қадамларни белгилаб олиш таклиф этилди.

Ўзбекистон томони ўзаро манфаатли ташаббусларни биргаликда ишлаб чиқиш, илғор тажриба алмашиш ва очиқ, конструктив мулоқотни давом эттиришга тайёрлигини билдирди.

Таъкидланганидек, мазкур конференция Марказий Осиё давлатлари ва Хитой ўртасида фуқаро авиацияси соҳасидаги ҳамкорликни янги босқичга олиб чиқиш, парвозлар хавфсизлиги ва самарадорлигини ошириш, шунингдек, минтақавий транспорт боғлиқлигини янада мустаҳкамлаш учун муҳим имконият яратади.