“Бюрократияни бартараф этиш – 2030” дастури доирасида транспорт соҳасини рақамлаштириш масалалари муҳокама қилинди
2026-07-27 17:00:00 / Янгиликлар
“Бюрократияни бартараф этиш — 2030” дастури Ўзбекистон Республикаси Президентининг 2025 йил 28 ноябрдаги “Давлат бошқарувини рақамли трансформация қилиш ва самарадорлигини ошириш бўйича ташкилий чора-тадбирлар тўғрисида”ги фармойиши ижросини таъминлаш мақсадида амалга оширилмоқда.
Дастурнинг асосий мақсади — давлат бошқаруви тизимини модернизация қилиш, ортиқча бюрократик тартиб-таомилларни қисқартириш ҳамда фуқаролар ва тадбиркорлик субъектлари учун давлат хизматлари сифати ва очиқлигини янги босқичга кўтаришдан иборат.
Семинар тренинг давомида Лойиҳа офиси томонидан давлат бошқарувида рақамли трансформацияни жадаллаштириш, бюрократик тўсиқларни қисқартириш ҳамда давлат хизматларини тўлиқ электрон шаклга ўтказиш бўйича амалга оширилаётган ишлар юзасидан тақдимот қилинди.
Семинарда Транспорт вазирлиги ва тизим ташкилотлари томонидан кўрсатилаётган 52 та давлат хизматини инвентаризациядан ўтказиш, уларнинг рақамлаштириш даражасини баҳолаш ҳамда босқичма-босқич тўлиқ электрон шаклга ўтказиш масалалари муҳокама қилинди.
Шунингдек, reestr.gov.uz платформаси орқали давлат ташкилотларининг рақамлаштириш даражасини баҳолаш механизми, давлат хизматларини my.gov.uz ва идоравий ахборот тизимлари орқали кенгайтириш, шунингдек, “Zero Bureaucracy” платформасига маълумотларни ўз вақтида киритиб бориш юзасидан амалий тавсиялар берилди.
Семинарда транспорт соҳасида рақамли технологияларни кенг жорий этиш, давлат хизматларини соддалаштириш, ортиқча бюрократик жараёнларни қисқартириш ҳамда аҳоли ва тадбиркорлар учун янада тезкор, шаффоф ва қулай хизматлар кўрсатиш бўйича амалга оширилаётган ишлар ва келгусидаги устувор вазифалар атрофлича муҳокама қилинди.