Navoiy viloyatida tibbiyot tizimini raqamlashtirishga nima halal beryapti?
2025-04-11 18:00:00 / Yangiliklar
Sog'liqni saqlash vaziri o'rinbosari olim Omonov tomonidan Navoiy viloyatida videokonferentsaloqa shaklida o'tkazilgan yig'ilishda hududdagi mavjud holat tizim rahbarlari ishtirokida chuqur tahlildan o'tkazildi.
Unda Qoraqalpog'iston Respublikasi sog'liqni saqlash vazirligi hamda Toshkent shahri va viloyatlar sog'liqni saqlash boshqarma boshliqlarining raqamlashtirish bo'yicha o'rinbosarlari joylardagi studiyalar orqali qatnashdi.
Qayd etilganidek, Prezidentimizning 2023 yil 20 iyundagi qarori bilan 2023 — 2024 yillarda Navoiy viloyatiga 989 ta kompyuter texnikasi olish ko'zda tutilgan bo'lib, mahalliy rahbarlar tomonidan hech qanday chora ko'rilmagan.
Viloyatda 2025 yil 1 iyuldan davlat tibbiy sug'urtasi tizimi joriy etilishi belgilangan hamda mahalliy hokimliklarga lokal tarmoqlar bilan ta'minlash topshirilgan. Lekin hozirga qadar qator muassasalarda lokal tarmoq mavjud emas.
Xatirchi TTBning bo'limlari va uning tasarrufidagi 10 ta oshp, Tomdi TTBning yuqumli kasalliklar, jarrohlik va bolalar bo'limlari va unga qarashli 2 ta oshp hamda Zarafshon Shtbning yuqumli kasalliklar bo'limini misol qilib keltirish mumkin. Bunday holat Navbahor, Karmana va Nurota tumanlarida ham kuzatilgan.
Vazirlikning 2024 yildagi buyrug'iga ko'ra, "yagona tibbiyot axborot tizimi"(DMED)ni viloyatda fevral oyigacha joriy etish ko'zda tutilgan, ammo 4 ta tibbiyot muassasasida tizim o'rnatilmagan.
Ayrim tumanlar birlashma rahbarlari, op va oshp mudirlari DMED tizimidan foydalanish bo'yicha nazorat olib bormayapti, ya'ni eski uslubda ishlashdan voz kecholmayapti. Natijada Nurota, Karmana, Navbahor, Xatirchi tumanlari hamda Navoiy shahar ko'p tarmoqli Markaziy poliklinikalarida DMED tizimida murojaatlar yopilmagan, ya'ni "navbatda" statusida qolib ketgan.
Hududdagi barcha tibbiyot muassasalarida elektron dastur o'rnatilgan bo'lishiga qaramay, shifokorlar tomonidan 30 mingdan ziyod bemor ko'rigi DMED tizimiga kiritilmagan. Masalan, Zarafshon shahri, Tomdi, Uchquduq, Xatirchi tumanlarida tizimdan foydalanish past darajada. Navbahor tuman ko'p tarmoqli Markaziy poliklinikasida esa u nomigagina mavjud.
Tadbirda aytilganidek, viloyatda "elektron resept" (reimbursasiya) dasturi ishga tushirilgan va dorixonalar provizorlari, op, oshp, KTMP shifokor va hamshiralari shu yo'nalishda o'qitilgan. Jamg'arma tomonidan 308 mln. so'm mablag'ajratilgan. Ammo mablag'ning atigi 15 foiziga elektron resept yozilgan, xolos. Ayniqsa, Uchquduq tumani hamda G'ozg'on va Nurota shaharlarida bu boradagi ko'rsatkich 0 foizni tashkil etganini aslo qabul qilib bo'lmaydi.
Viloyatdagi vaziyat aniq bo'lgani holda, mutasaddilarning zarur choralar ko'rmayotgani yanada taajjublidir. Bu masala vazirlik hay'at yig'ilishida 2 bor, vazir va vazir o'rinbosarlari ishtirokida 4 marta muhokama qilingani holda, viloyat boshqarmasi tomonidan umuman ko'rib chiqilmaganligiga nima deyish mumkin.
Xo'sh, viloyatda tibbiyotni raqamlashtirishga nima halal beryapti?
Yig'ilishda shu yuzasidan ham fikr-muhazalar bildirildi. O'z navbatida, hududdagi ijobiy holatlar namuna sifatida ko'rsatib o'tildi. Yakunda keltirib o'tilgan kamchiliklarni bartaraf etishga qaratilgan zarur vazifalar belgilab olindi.
Sog'liqni saqlash vazirligi
Matbuot xizmati.