O‘zbеkistоn Rеspublikаsi Sоg‘liqni saqlash vаzirligi

Avval xabar berganimizdek, joriy yilning 25-26 dekabr kunlari Sog'liqni saqlash vaziri boshchiligidagi soha mas'ullari hukumat delegasiyasi tarkibida xizmat safari bilan Turkiya Respublikasida bo'ldi.

Tashrif davomida vakillarimiz "ACIBADEM Healthcare Group" prezidenti Mehmet Ali Aydinlar bilan uchrashdi.

Ushbu nufuzli tibbiyot muassasasi dunyo bo'ylab ko'plab klinika va markazlar tarmog'iga ega xalqaro brend hisoblanadi.

Xususan, kardiologiya, onkologiya, organ va to'qimalar transplantasiyasi, neyroxirurgiya, robot jarrohligi va sport tibbiyoti kabi sog'liqni saqlash sohasining ko'plab yo'nalishlari integrasiyalashgan ushbu muassasa tarkibida jami 24 ta klinika, 16 ta tibbiyot markazlari va boshqa qator kompaniyalar faoliyat ko'rsatmoqda.

Jahon standartlariga to'liq javob beradigan mazkur klinikalar o'zining ilg'or tajriba markazlari bilan alohida ajralib turadi. Ularning barchasi milliy va xalqaro akkreditasiyadan o'tgan bo'lib, zamonaviy texnologiya va tibbiyotning ko'plab sohalarida boy tajribaga ega mutaxassislar bilan ta'minlangan.

Har yili dunyoning turli nuqtalaridan minglab bemorlar sifatli va malakali tibbiy xizmatlarni olish uchun ushbu klinikalarga tashrif buyuradi.

"ACIBADEM Healthcare Group" tibbiy ta'lim va ilmiy tadqiqotlar sohasida ham mamlakatda etakchilardan biridir. Jumladan, uning negizidagi Acibadem tibbiyot universitetida tahsil olayotgan talabalar zamonaviy o'quv dasturlari asosida malakali pedagoglar tomonidan o'qitiladi. Muassasada talabalarning amaliy ko'nikmalarini rivojlantirishga mo'ljallangan ilg'or simulyasion markazlar ham mavjud.

Samimiy va do'stona ruhda o'tgan muloqot davomida Toshkent shahrida Acibadem klinikasini ochish bo'yicha kelishuvga erishildi.

Shuningdek, uchrashuvda birgalikda kadrlarni tayyorlash, mutaxassislarni o'qitish va malakasini oshirish, tibbiy ta'lim kabi yo'nalishlarda hamkorlik aloqalarini o'rnatish masalalari ham ko'rib chiqildi.

Sog'liqni saqlash vazirligi
Matbuot xizmati.