O‘zbеkistоn Rеspublikаsi Sоg‘liqni saqlash vаzirligi

Muassasa xodimlari o'z faoliyatida doimo "bemor salomatligi — hamma narsadan ustun" shioriga amal qiladi. Shu sababli xorijiy tajriba asosida aholiga sifatli tibbiy yordam ko'rsatish uchun yuqori texnologiyali xizmatlar doirasini kengaytirmoqda.

Klinika bosh shifokori Dildora Rustamova muassasa faoliyati to'g'risida ma'lumot berdi:

 — Klinikada 1209 ta o'rin mavjud. Kunlik 850 qatnovga mo'ljallangan maslahat-diagnostika poliklinikalari ishlab turibdi. Har yili 250 ming nafardan ortiq bemorlarga terapevtik, jarrohlik, akusher-ginekologik va pediatriya yo'nalishlarida shoshilinch, rejali, stasionar hamda ambulator tibbiy xizmat ko'rsatiladi.

Muassasa 14 ta binodan tashkil topgan. Ushbu zamonaviy tibbiy ta'lim klasterida bemorni davolash ishlari kafedra xodimlari va talaba, magistrlar bilan birgalikda olib boriladi. 

Jarrohlik operasiyalari, tibbiy muolajalar jarayonida ham tinglovchilar bevosita ishtirok etib, ta'lim va amaliyot uyg'unligiga erishilmoqda.

Muhimi, akademiyadagi tadqiqotlar, ixtirolar birinchi navbatda ushbu nufuzli klinikada amaliyotga tatbiq etiladi. 

Muassasada 365 nafar shifokor faoliyat yuritib, ulardan 6 nafari tibbiyot fanlari doktori, 16 nafari tibbiyot fanlari nomzodi, 219 nafari esa oliy toifali shifokordir.

Hozir bu erda 70 dan ortiq bo'limlar mavjud. Ular orasida neyroxirurgiya, yiringli jarrohlik, kardiologiya, revmatologiya, bolalar revmatologiyasi eng yirik bo'limlar hisoblanadi. 

Klinikada malakali shifokorlar tomonidan izlanishlar olib borilib, yangi diagnostika va davolash usullari keng qo'llanilmoqda. Bunda xorijlik hamkasblar bilan hamkorlik ham qo'l kelyapti.

Jumladan, joriy yilda Torako-abdominal jarrohlik bo'limida klinikamizda ilk bor qizilo'ngach axalaziyasi tashxisi qo'yilgan bemorda Geller Laparoskopik operasiyasi o'tkazildi.

Qon tomir jarrohlik bo'limida esa yaqinda Sankt-Peterburg davlat pediatriya tibbiyot universiteti professori A. Xilchuk bilan birgalikda yana bir yuqori texnologik amaliyot bajarildi.

Suyak yiring xastaliklari jarrohligi bo'limida joriy etilayotgan amaliyotlar sabab og'ir holatdagi bemorlar shifo topishiga erishilmoqda.

Qozon davlat tibbiyot universiteti professori I. Axtyamov bilan birgalikda bajarilgan chanoq-son va tizza bo'g'imlarini Total endoprotezlash operasiyalari ham yaxshi samara berdi.

Shuningdek, joriy yilda akusherlik va ginekologik yo'nalishlarda laparaskopik gisterektomiya, tug'uruqdan keyingi metroplastika, bachadon bo'ynini Manchester bo'yicha plastika qilish va jarrohlikda yiringli nekrotik jarohatlarda vakuum terapiya yangi diagnostika hamda davolash usullari joriy etildi. 

Shunday qilib, jami amaliyotda qo'llanilayotgan tashxis va muolaja usullari soni 575 taga etdi.

Joriy yilning o'tgan davrida klinikada 3774 ta jarrohlik operasiyasi o'tkazildi, shundan 574 tasi yuqori texnologik amaliyotlardir.

Klinikamizda tibbiy turizmni rivojlantirish masalasi ham alohida e'tiborda. Jumladan, joriy yil boshidan buyon 330 nafardan ortiq chet el fuqarosi murojaat qilgan bo'lib, ulardan 150 nafari stasionar sharoitda davolangan.

Yaqin kunlarda bemorlarning xastaliklardan so'ng tiklanishini yaxshilash maqsadida Reabilitologiya bo'limini ochmoqchimiz. Bunda xitoylik hamkasblarimiz bilan hamkorlik qilib, ularning bu boradagi yutuqlarini joriy qilgan holda reabilitasiya jarayonlarini zamonaviy bosqichga olib chiqmoqchimiz. 

Sog'liqni saqlash vazirligi
Matbuot xizmati.