O‘zbеkistоn Rеspublikаsi Sоg‘liqni saqlash vаzirligi

Bu borada Respublika shoshilinch tibbiy yordam ilmiy markazi, uning joylardagi 13 ta hududiy filiali, 48 tumanlararo qo'shma shikastlanishlar va o'tkir yurak-qon tomir kasalliklari markazi hamda 133 ta tuman shoshilinch qabul bo'limlari hissasi katta. 

Muhimi, markazda joriy etilayotgan eng ilg'or diagnostika va davolash usullari bosqichma-bosqich hududlarda ham yo'lga qo'yilishi natijasida aholining uzog'i yaqin bo'lyapti. 

 — Hududiy filiallarimizda kam invaziv jarrohlik amaliyotlari, jumladan, kardiologiya va laparoskopiya yo'nalishlarida murakkab operasiyalar o'zlashtirilmoqda, — deydi markaz bosh direktori Davron To'laganov. — Misol uchun, yaqinda muassasamizning Xorazm filialida Sankt-Peterburg ilmiy tekshirish institutining yurak-qon tomir va endovaskulyar xirurgiya bo'limi boshlig'i S.Platonov boshchiligida mahorat darslari o'tkazildi. 

Ushbu mashg'ulotlar doirasida og'ir darajadagi diabetik to'piq sindromi va oyoqlar kritik ishemiyasi bo'lgan 7 nafar bemorda ilg'or endovaskulyar usulda murakkab amaliyotlar bajarildi. Yakunda a'lo angiografik natijalarga erishildi. Muhimi, bu kabi operasiyalar barcha filiallarimizda o'tkazib kelinmoqda.

O'z navbatida, muolajalarning muvaffaqiyatli kechishida hududlarda teletibbiyot imkoniyatlaridan samarali foydalanilmoqda. Hozir bu yo'nalishda ko'plab etakchi xorijiy shifoxonalar, jumladan, Germaniyaning Sharite klinikasi bilan viloyat filiallari va tuman subfiliallari darajasida hamkorlik qilib kelyapmiz.

Qolaversa, tibbiyotni xalqqa yaqinlashtirish maqsadida Yaponiyaning JICA tashkiloti bilan memorandum imzolaganmiz. Uning doirasida joriy yil yakuniga qadar 4 ta mobil kompyuter tomografli konteyner yurtimizga olib kelinib, hududlarga o'rnatiladi. Ulardan sayyor tibbiy ko'riklarda bemorlarga tezkor va aniq tashxis qo'yishda foydalanamiz. 

Bundan tashqari, yaqinda Parij shahrida bo'lib o'tgan O'zbekiston — Frantsiya tibbiyot forumi doirasida markazimiz ushbu davlatning tez yordam assosiasiyasi, fosh klinikasi va shoshilinch tibbiy yordam milliy kengashi bilan o'zaro hamkorlikni yo'lga qo'ydi.

Tumanlararo qo'shma shikastlanishlar va o'tkir yurak-qon tomir kasalliklari markazlari moddiy-texnik bazasini mustahkamlash masalasi ham alohida e'tiborimizda. Bugungi kunda ulardan ikkitasida zamonaviy angiografiya uskunasi o'rnatilmoqda. 

Qolgan shunday muassasalarning barchasi 34 turdagi yuqori texnologik uskunalar bilan jihozlangan.  Ushbu markazlar uchun yuqori malakali kadrlar tayyorlash va qayta tayyorlash tizimi izchil amalga oshirilmoqda. Masalan, shu yilning ilk choragida 100 dan ortiq mutaxassis o'qitildi. 

Hozirgi kunda Rshtyoimda "SAYAR LLC" kompaniyasi tomonidan tibbiy va umumiy chiqindilarni qayta ishlash zavodi qurilmoqda. Simulyasion o'quv binosini zamonaviy tibbiy asbob-uskunalar bilan jihozlash maqsadida ta'mirlash rejalashtirilgan. 

Markaz hududida chet ellik hamkorlar bilan erta reabilitasiya klinikasi binosini qurish loyihasi ishlab chiqilyapti.

Albatta, bularning barchasi kelgusida muassasamizda ko'rsatilayotgan tibbiy xizmatlar sifati va qamrovini oshirish orqali aholining tibbiyotdan roziligiga erishish uchun asos bo'lishi, shubhasiz.

Sog'liqni saqlash vazirligi
Matbuot xizmati.