O‘zbеkistоn Rеspublikаsi Sоg‘liqni saqlash vаzirligi

 — Xususan, ayni paytda vazirlik qoshida manfaatlar to'qnashuvi va korrupsiya holatlari bo'yicha tezkor xabar berish, bu boradagi kamchiliklarning o'z vaqtida oldini olish va ularni bartaraf etish maqsadida 71 241-10-65 yoki respublika bo'yicha yagona 1203 raqamli "ishonch telefoni" faoliyat yuritmoqda, — deydi korrupsiyani oldini olish va kurashish bo'limi etakchi mutaxassisi Azizbek Shukurov.

 — Shuningdek, vazirlik rasmiy veb-saytining ssv/pages/komplaens-xizmati sahifasi, ssvuz/compliaence elektron pochtasi va t.me/ssvantikor_bot Telegram boti ishga tushirilib, fuqarolarning tibbiyot tizimidagi korrupsion holatlar bo'yicha murojaatlari qabul qilinyapti.

Sohada byudjet qonunchiligi buzilishi, korrupsiyaviy xatti-harakatlar va moliyaviy kamchiliklarga yo'l qo'yilishining oldini olish maqsadida vazirlik qoshida Situasion markaz tashkil etildi.

Tibbiyot muassasalarida amalga oshirilayotgan har bir moliyaviy operasiyani kuzatib borish va nazorat qilish imkonini beruvchi ushbu markaz "xarid.uzex.uz", "xt-xarid.uz", "Shaffof qurilish", "UzASBO", "DMBAT", "registr.stat.uz" hamda boshqa axborot tizimlari va hisob palatasining elektron ma'lumotlar bazasi asosida faoliyat olib boradi.

Shuningdek, davlat tibbiyot muassasalariga yuqori malakali kadrlarni ishga qabul qilishning yangi elektron mexanizmi yaratilib, o'tgan yil noyabr oyidan Buxoro viloyatida sinov tariqasida yo'lga qo'yildi.

Unga ko'ra, tibbiyot muassasalaridagi mavjud bo'sh ish o'rinlari to'g'risidagi ma'lumotlar, nomzodlarga qo'yiladigan talablar bir vaqtning o'zida davlat fuqarolik xizmati vakant lavozimlarining ochiq portali (vacancy.argos.uz), elektron platformasi (hrm.argos.uz), yagona interaktiv davlat xizmatlari portali (my.gov.uz) hamda vazirlikning rasmiy veb-saytida (vacancy.ssv.uz) e'lon qilinib, ushbu platformalar orqali ishga kirish uchun ariza yuborish xizmati joriy etilgan.

Qolaversa, davolash-profilaktika muassasalaridagi shifokorlar va o'rta tibbiyot xodimlari lavozimlari uchun malaka talablari hamda tanlov o'tkazish uchun test va suhbat savollari bazasi ishlab chiqilib, Prezident huzuridagi Davlat xizmatini rivojlantirish agentligi bilan hamkorlikda test.argos.uz platformasiga joylashtirildi.

Mazkur yangi tizim o'zini amalda oqlagani bois 2025 yil mart oyidan respublika miqyosida to'liq joriy etilishi rejalashtirilgan.

Ayni paytda korrupsiyaga qarshi kurashish agentligining "t-anticor.uz" platformasiga vazirlik tizimida korrupsiyaga qarshi kurashish ishlarining samaradorligini baholovchi ma'lumotlar doimiy kiritib borilmoqda.

Sog'liqni saqlash vazirligi
Matbuot xizmati.