SSV: Travmatologiya va ortopediya markazida robot jarrohligi joriy etiladi
2025-01-26 10:00:00 / Yangiliklar
— Muassasamizda "robot jarrohligi"ni yo'lga qo'yish, xususan, ushbu amaliyotni tizza bo'g'imlari kasalliklarini davolash jarayonida qo'llashni rejalashtirganmiz, — deydi markaz direktori Murod Irismetov.
— Mazkur yangilikning afzalliklari ko'p. Masalan, operasiya o'ta yuqori aniqlikda bajariladi. Jarayon xavfsizligi ta'minlanadi. Shifokorga inson tanasining eng murakkab qismlari hamda kasallikning eng og'ir darajalarida xam erkin ishlash imkonini beradi.
Natijada maxsus dastur yordamida murakkab amaliyotlar chog'ida yuzaga kelishi mumkin bo'lgan xirurgik xatoliklarning oldi olinadi.
Ilg'or diagnostika va muolaja usullarini bosqichma-bosqich tumanlarda ham joriy qilishga kirishganmiz. Jumladan, shu yil davomida tuman (shahar) shifoxonalarida 2 ta yangi diagnostika va 8 ta davolash usuli amaliyotga tatbiq etiladi.
Chunonchi, yurtimizning 48 ta tumani va 10 ta shahrida son suyagi distal oxiri siniqlarini retrograd BIOS qilish, chanoq-son va tizza bo'g'imlarini Total endoprotezlash, son suyagi proksimal oxiri siniqlarini yangi modeldagi BIOS INTERTAN bilan osteosintezlash, butsimon boylamlar jarohatining artroskopik autoplastikasi, PRP terapiya, AO plastinalari bilan osteosintez qilish usullari o'zlashtiriladi.
Natijada bemorlarning ortiqcha vaqt va mablag'sarflab, xorijiy davlatlar yoki poytaxtimiz va viloyatlar markazlariga uzoq tumanlardan qatnovi 10 foizga kamayadi.
Bundan tashqari, bevosita markazning malakali mutaxassislari tomonidan hududlarda 6 mingga yaqin tibbiy ko'riklar, 300 dan ziyod yuqori texnologik operasiyalar o'tkaziladi.
Buxoro, Samarqand, Farg'ona, Toshkent va Navoiy viloyatlarida sayyor tsikllar tashkil qilinib, mahalliy mutaxassislarni o'qitish orqali chaqaloqlarda chanoq-son bo'g'imi displaziyasini UTT yordamida diagnostika qilish usuli yo'lga qo'yiladi.
O'z navbatida, Xitoy, Rossiya, Germaniya, AQSh, Janubiy Koreya, Turkiya, Belarus, Hindiston kabi qator rivojlangan davlatlardan malakali mutaxassislarning mamlakatimizga tashrifi amalga oshirilib, ular ishtirokida joylarda mahorat darslari, tibbiy ko'riklar va qo'shma operasiyalar o'tkazamiz.
Shuningdek, tibbiy turizmni rivojlantirish — 2025 yilda oldimizga qo'ygan ustuvor maqsadlarimizdan biri. Bu orqali markazga jalb etiladigan chet ellik bemorlar soni, tibbiy xizmat ko'rsatish hajmi va sifati yanada oshishi, shubhsiz.
Sog'liqni saqlash vazirligi
Matbuot xizmati.