Sog'liqni saqlash vazirligining tegishli buyrug'i bilan Navoiy viloyati tibbiyot muassasalarida qator tayinlovlar amalga oshirildi
2025-01-16 11:40:00 / Yangiliklar
Xususan:
Xamraev Rustamjon Istamovich Respublika ixtisoslashtirilgan onkologiya va radiologiya ilmiy-amaliy tibbiyot markazi Navoiy filiali direktori lavozimiga tayinlandi.
R. Xamraev 2005 yilda Toshkent pediatriya tibbiyot institutini tamomlagan. 2005 – 2007 yillarda Respublika shoshilinch tibbiy yordam ilmiy markazi Navoiy filiali klinik ordinaturasida tahsil olib, mehnat faoliyatini ushbu muassasada shifokor sifatida boshlagan.
Keyinchalik Navoiy viloyati sog'liqni saqlash boshqarmasida bo'lim boshlig'i, viloyat ko'p tarmoqli tibbiyot markazi bosh shifokorining davolash ishlari bo'yicha o'rinbosari, viloyat sog'liqni saqlash boshqarmasi boshlig'ining birinchi o'rinbosari kabi mas'ul lavozimlarda ishlagan.
R. Xamraev tayinlovga qadar Navoiy viloyat ko'p tarmoqli tibbiyot markazi bosh shifokorining davolash ishlari bo'yicha o'rinbosari sifatida faoliyat ko'rsatib kelayotgan edi.
* * *
To'xtaev Matyoqub Qo'shievich Respublika ixtisoslashtirilgan travmatologiya va ortopediya ilmiy-amaliy tibbiyot markazi Navoiy filiali direktori lavozimiga tayinlandi.
M. To'xtaev 2006 yil Toshkent pediatriya tibbiyot institutining bakalavriat bosqichini, 2008 yil Respublika travmatologiya va ortopediya ilmiy-tekshirish instituti klinik ordinaturasini tamomlagan.
Mehnat faoliyatini Qiziltepa tuman Markaziy shifoxonasi vrach-travmatologi sifatida boshlab, keyinchalik ushbu muassasada bo'lim mudiri, tuman tibbiyot birlashmasi boshlig'ining davolash ishlari bo'yicha o'rinbosari, birinchi o'rinbosari, tuman ko'p tarmoqli Markaziy poliklinikasi mudiri kabi mas'ul lavozimlarda ishlagan.
M. To'xtaev tayinlovga qadar Navoiy viloyat ko'p tarmoqli tibbiyot markazi jarrohlik bo'limida travmatolog-ortoped sifatida faoliyat ko'rsatib kelayotgan edi.
Sog'liqni saqlash vazirligi
Matbuot xizmati.