SSV: Andijon viloyati sog'liqni saqlash muassasalari faoliyati tanqidiy tahlil qilindi
2024-12-26 19:10:00 / Yangiliklar
Videokonferents-aloqa shaklidagi ushbu majlisda vazir o'rinbosarlari, joylardagi studiyalardan barcha hududiy boshqarmalar hamda tuman (shahar) tibbiyot birlashmalari mas'ullari ishtirok etdi.
Tadbirni Sog'liqni saqlash vaziri Asilbek Xudayarov olib bordi.
Dastlab joriy yil 24 dekabr kuni davlatimiz rahbari huzurida sog'liqni saqlash sohasiga bag'ishlab o'tkazilgan yig'ilishda belgilab berilgan ustuvor vazifalar haqida atroflicha so'z yuritilib, ularni amalga oshirish yuzasidan joylardagi mas'ullarga tegishli topshiriqlar berildi.
Shundan so'ng majlisda Andijon viloyati sog'liqni saqlash muassasalarida o'tkazilgan o'rganish ishlari natijalari tanqidiy-tahliliy ko'rib chiqildi.
Xususan, vazir bugungi kunda viloyatda tibbiyot yo'nalishida aholi murojaatlari bilan ishlash holati talab darajasida emasligi, ayrim tuman tibbiyot birlashmalarida 1103 qisqa raqamli "ishonch telefoni" faoliyati haligacha yo'lga qo'yilmaganini jiddiy tanqid ostiga oldi.
Qolaversa, ba'zi tumanlarda mahalla tibbiyot punktlari va kunduzgi stasionarlar faoliyati samarali tashkil etilmagani qayd etilib, bu borada sustkashlikka yo'l qo'ygan mas'ullarning lavozimga loyiqligi masalasi ko'rib chiqilishi ta'kidlandi.
Yig'ilishda qandli diabet, sil kasalliklari profilaktikasi samaradorligini oshirish, viloyat aholisi orasida to'g'ri ovqatlanish va sog'lom turmush tarzini keng yo'lga qo'yish, tibbiyot muassasalarini zarur dori vositalari bilan ta'minlash, onalar va bolalar salomatligini asrash, sohada korrupsiyaga qarshi kurashish, kadrlar ta'minoti va ularning salohiyatini oshirish kabi bir qator masalalar ham tahlil etilib, bu bo'yicha tibbiyot xodimlari oldiga aniq vazifalar belgilab berildi.
Shuningdek, majlisda vazir A.Xudayarov 2025 yil sog'liqni saqlash tizimida mahalliy hokimliklar bilan hamkorlikda ishlash, sohaga investisiya kiritish, tibbiyotni, xususan, patronaj xizmatini xalqqa yanada yaqinlashtirish, kasalliklarning oldini olish, erta aniqlash va samarali davolash kabi masalalarga alohida e'tibor qaratilishi va bu borada aniq chora-tadbirlar ishlab chiqilishini aytib o'tdi.
Sog'liqni saqlash vazirligi
Matbuot xizmati.